نهى عابدين تفتح خزانة أسرارها وتكشف مفاجآت لأول مرة

فتحت نهى عابدين خزانة أسرارها خلال لقائها مع الإعلامية منى الشاذلي في برنامج معكم، وتحدثت عن علاقتها العاطفية وعلاقتها بابنها، كما تطرقت للحديث عن أدوارها التي قدمتها خلال مشوارها الفني.

العلاقة العاطفية لنهى عابدين

وردت نهى عابدين بطريقة ساخرة على رؤيتها لوجود الرجل في حياتها قائلة: "ودع دماغ" وقالت نهى عابدين: "خليني أقول إني أنا تركيبة مش سهل التعامل معها، أنا مريت وشوفت حاجات كتير، خبرات على تحديات على فقد على حاجات حلوة، ضيفي ليهم كمان الطموح فيه حاجات  تحققت وطموحات لم تتحقق، واعتمادها على الآخرين صفر أنا لا أعتمد على أي شخص غيري".

علاقة نهى عابدين بابنها

وعن علاقتها بابنها الوحيد قالت نهى عابدين إن علاقتها معه ليست علاقة تقليدية أو مجرد أم وابنها، وإنما هي علاقة أعمق من ذلك بكثير موضحة: "أنا علاقتي بابني مش علاقة أم بابنها الموضوع له أبعاد كبيرة وأمور تاني أعمق بكثير، أنا طول الوقت بسعى إن ابني يكون نموذج للرجل اللي أتمنى أقابله، ونموذج للأب اللي كنت أتمنى يكون موجود، علشان مستقبل ابني وللي هيتجوزها، لكن مش بسعى لده علشاني، بسعى ليه زي ما بقولك ليه هو ولولاده وللست اللي هيتجوزها".

أدوار نهى عابدين

 وعن أدوارها التي قدمتها خلال مشوارها الفني، وخاصة دور توحة، الذي اشتهرت به في مسلسل العتاولة قالت نهى عابدين: "أنا طول الوقت بركز على أني مش عاوزة أكرر نفسي وطول الوقت عندي هاجس وخوف أني اعمل حاجة شبه حاجة، ولما الواحد بيعمل دور أو شخصية بتنجح بتلاقي طول الوقت تقديم شغل في السكة دي وده أنا مش عاوزاه.. لأن مهم الإنسان يغير وينوع ويقدم أدواراً مختلفة طول الوقت ده اللي بيبين الموهبة".

وأضافت: "وتقديم أدوار جديدة مش بس من باب الاختلاف، لكن هو مهم بالنسبة لي كثير جدا، خلينا نتفق إن من الحاجات المهمة بالنسبة لي أني أبص في مشواري ألقي أدواراً كتير مختلفة، وأنا مش مستعجلة، ويهمني مش الشغل الكثير يهمني الشغل القليل المهم".

وتطرقت نهى عابدين للحديث عن مسلسل ونوس، قائلة إنها كانت قدمت شخصية في مسلسل الكابوس، مع الفنانة غادة عبد الرازق، ومخرج مسلسل ونوس، شادي الفخراني كان يحتاج هذه الشخصية، وهو الذي شجعها على الدور، الذي يعد واحد من أهم أدوارها أيضاً، لتشارك ف يالمسلسل الشهير خلال فترة دراستها.

وتقول نهى عابدين عن مشاركتها في مسلسل نوس رغم انشغالها في الدراسة: "طول الوقت كنت عايزة اعمل كل حاجة مع بعض أدرس، واشتغل واتجوز واخلف بدري، كنت ضاغطة طول الوقت ومحملة نفسي حمول كتير أوي.. لكن لما شاركت في مسلسل ونوس النجوم كلها ساعدوني وده كان ليه دور إني أقدم الدور بشكل جيد أكيد، وخلاني أكون متحمسة إني أكون في نفس مستوى النجوم المشاركين".

كما تطرقت للحديث عن دورها في مسلسل تحت الوصاية قائلة: "أنا بعتز بالدور ده جدا جدا، لأن شخصيات المسلسل كلها كان فيها الخير والشر، وأنا بعتز بالمسلسل ده ليس فقط كممثلة فيه، ولكن كسيدة وكمشاهدة، وأنا في النهاية يهمني إني أحافظ على أي حاجة بوصل لها مش نجاح لمجرد الفرقعة وخلاص".