نجل الراحل إبراهيم يسري يرثي والده بكلمات مؤثرة

بكلمات مؤثرة رثى محمد يسري نجل الفنان الراحل إبراهيم يسري والده على حسابه الشخصي على موقع التواصل الاجتماعي فيسبوك، ونشر مع التدوينة صورة في طفولته جمعته مع والده.

حيث كتب محمد يسري:

"الفراق صعب علي اللي عايشين بس" جملة سمعتها من واحد قاعد في المستشفي لما شافني شايل ابويا و داخل اغسّله و من ساعتها و هي بترن في ودني.. ممكن ناس كتير تشكك في مصداقيتي لو اتكلمت عن ابويا لكن بصراحة دي اخر حاجة ممكن أفكر فيها لإن ربنا وحده اللي عالم ان كل كلمة بكتبها دلوقتي مش هتوفي الراجل ده حقه.. و انا مش بتكلم عن الفنان، لإنه زي أي فنان بيمتهن الفن لا يمكن الناس كلها تجتمع عليه و أكيد هتتفاوت درجات حبهم ليه.. أما الإنسان ف ده موضوع تاني خالص.. ومن نعم ربنا علينا إنه الحمد لله حبب ناس كتير فيه و كلهم بيشهدوا بأخلاقه حتي لو علاقتهم بيه بس من خلال التلفزيون.. كل اللي يعرفوني كويس عارفين إننا عيلة صغيرة أوي وعلاقتنا قوية أوي ببعض وده كله بفضل أبويا وأمي برغم إن والدي فقد والديه وهو طفل صغير واللي ربته كانت أخته الله يرحمها.. وكانت نتيجة ده أنه كبر هادئ الطباع، بيحب خصوصيته جداً، عاشق للقراءة، بيكره الصوت العالي وبيحافظ دايما على حدود الاحترام في التعامل مع أي حد بغض النظر عن مكانة الشخص ده سواء في الوسط الفني أو في الحياة العامة.. وأنا طفل عندي ١٤ سنة كنت واقف في المطبخ وأبويا الله يرحمه كان موجود وسامعني وأنا باتكلم في التليفون وأنا اهلي كانوا معودني إني أتكلم وأقول اللي أنا عايزه قدامهم عادي ومخافش لأَنِّي لو خفت ابقي بغلط، المهم أنه سمعني وأنا بقول على واحدة معانا في المدرسة إنها سخيفة أوي وبعد ما قفلت التليفون جابني وقعد يتكلم معايا وطلب مني إني عمري ماتكلم على حد من ضهره وإني حتي لما أكبر و أتعرف على حد عمري ماتكلم على أسراره أو عنه أبدا مهما كان غلطان فيا.. كانت هي دي أخلاق إبراهيم يسري.. عاش رجلا بأخلاق الفرسان النبلاء حتي وإن لم تكن تلك سمات زمنه ورحل عنا تاركا سيرة طيبة.. الفراق فعلا صعب على اللي عايشين بس.. بس لما بيكون حد ربنا محبب فيه الناس بالشكل ده بيبقي الفراق صعب أوي..

‫#‏الغائب_الحاضر‬ ‫#‏رحل_الفارس_عن_دنياي‬ ‫#‏وداعاً_ابراهيم_يسري"

عزاء الفنان الراحل إبراهيم يسري بحضور كوكبة من نجوم الفن

تشييع الفنان إبراهيم يسري بحضور الكبار وغياب النجوم الشباب

الفنان إبراهيم يسري يفارق الحياة في يوم عيد ميلاده

صور تشييع الراحل الكبير عبد الرحمن الأبنودي في جنازة عسكرية

‬