مسلم يعلن عودته لخطيبته ويكشف مفاجآت جديدة بشأن طلاقه

كشف المطرب مسلم، مفاجآت لأول مرة بشأن انفصاله عن ميكا البغدادي، كما أعلن عودته لخطيبته متحدثاً عن سر تحفظه على إعلان الأمر.. إليك أبرز تصريحات مسلم مع الإعلامية أميرة بدر في برنامج أسرار.

مسلم يعود لخطيبته

كما فاجأ مسلم الجمهور بعودته لخطيبته قائلاً: " أنا وخطيبتي رجعنا لبعض وما أعلناش عشان الناس متفكرش إننا بنعمل  ضجة أو نزيد مشاهدات ولا نطلع تريند  ولقطة لأن هي أنضف من كده، وناوي نعقل ونكبر وما نتسرعش في أي قرار ناخده بعد كدة".

وأضاف المطرب الشهير: "أنا قبل ما أخطب كان فيه ستات كتير حواليا، وكمان كان عندي علاقات كتير، لكن كلها علاقات باحترام، وناس كتير ما كانتش موجودة قربت في عز ما طلقت، وحبيت أعمل خطوة الخطوبة عشان أطلع بره الحوارات دي كلها الحقيقة، وعشان محدّش حط أمل خاصة إني بتعامل كويس جداً وممكن حد يفتكر إني بحبه أو معجب بيه.. لما خطبت حبيت أعمل ده حتى لو مش متأكد إني بحبها مية في المية،  وكنت واثق إني في المستقبل هحبها  100٪ لأن هي شخصية تتحب الحقيقة وإنسانة جدعة جدا  والكويس في الزمن ده مش كتير".

 وعن سبب فسخ خطوبته قال مسلم: "الحقيقة علشان أكون أمين الغلط كان من عندي لأني اتسرعت، أنا كنت زعلان وصعبت عليا نفسي من موقف كده حصل،  لكن هي ما سابتنيش وجت صالحتني، وزعلت جدا لأننا مكملناش  18 يوم خطوبة ودي حاجة مش حلوة قدام الناس ولا كنت حابب إن حد يشمت فيا".

 وكان مسلم تعرض لانتقادات حادة بعد خطوبته  وسط تساؤلات من الجمهور حول سرعة دخوله في علاقة جديدة بعد الانفصال بفترة قليلة ليربط البعض بين ما تردد على لسان طليقته وبين خطوبته فكتبت متابعة: "ميكا كان عندها حق إنه يخونها ما هو محدش يدخل في علاقة بالسرعة دي إلا لو كان موجود فيها فعلاً قبل الانفصال". وهي الانتقادات التي رد عليها مسلم قائلاً: "الناس قلبت عليا السوشيال ميديا كلها، أنا روحت خطبت يا جماعة عشان  ده طبيعي إن الناس بتعدي وبتنسى خلاص مشيت في طريق ونسيت والحقيقة إن ربنا أكرمني بشخصية  تفهمني".

سبب انفصال مسلم عن زوجته ميكا البغدادي

وتحدث مسلم عن انعكاس أحداث حياته على الأعمال والأغنيات التي يقدمها قائلاً: "حياتي الشخصية  سيطرت على الأغاني اللي بأقدمها، لأن الناس بتحب تعمل كدة، وأنا لو نزلت ستوري عادي لازم برضه الناس تربطها بحياتي الخاصة".

وعن طلاقه من ميكا البغدادي قال مسلم: "أعلنت طلاقي من ميكا  لأني مكنتش عاوز أوقف حياة علشان خاطر حاجة، وعلشان لو ربنا كرمها بحد غيري، لأني أكيد مش هوقف لها حياتها، وميكا  البغدادي بقت مشهورة مؤخراً وعندها فانز لأن جوازنا شهرها، بس أنا ما طلقتهاش لما اتشهرت أنا وبقى معايا فلوس زي ما بيتقال  لأني من زمان مرتاح وأنا من الناس المسرفين وكريم مع اللي حواليا".

وعن السبب الحقيقي قال مسلم:  "أنا وميكا انفصلنا لأننا مش دماغ بعض ومش واخدين بعض عن حب كمان، هي كانت صاحبتي في الأول وهي ست محترمة وما زالت محترمة لكن ما اتفاهمناش فاحنا الاتنين قررنا إن كل واحد يعيش حياته ويفضل الطفل ما بينا بكل احترام، وابني ده طبعاً حتة من قلبي وعالم تاني بعيداً عن أي حاجة ولا ليه دخل بالمشاكل دي كلها".

 وكانت طليقة مسلم نشرت مقطع فيديو، عبر حسابها الشخصي على تطبيق تبادل الصور إنستغرام، تحدثت فيه عن أسباب انفصالها قائلة: "علشان نحسم الأمر، أنا اللي طلبت الانفصال عن مسلم وده لأن هو من سنة ونص قبل طلبي  على علاقة بواحدة تانية لكن أنا احترمت أن فيه بينا ولد، واللي شوفته معاه مكانش قليل ولا سهل، هو بس عايز يستعطف الناس علشان هاجموه وأنا الحقيقة فرحت له لما عرفت أنه خطب".

 هل خان مسلم زوجته؟

ورد مسلم على اتهامه بخيانة زوجته ميكا البغدادي قائلاً: "كل اللي اتقال طبعاً مش حقيقي هي بنفسها قالت كده غيره عليا، أي واحدة ممكن تعمل  كده هتطلع اللي قدامها وحش عشان بس كل الناس تتعاطف معها، مشكلة ميكا إنها اهتمت تطلع تريند، وماهتمتش أنها تظلم حد وهي ظلمتني في ده بس،  لكن أنا ماظلمتهاش.. لكن الحقيقة أنا وهي ظلمنا بعضنا لما أخدنا بعض من غير ما يكون على اقتناع واتجوزنا جواز صالونات، فبقيت أعيش حياتي  بشكل طبيعي فبنزل وبروح وأشوف صحابي وأخرج مع ده ودي لكن أنا مش بخونها وعدم الاهتمام وحش، هي كانت مهتمة بشغلها جدًا لأنها كانت فاتحة أتيليه مع صديقة ليا والصديقة دي كانت هي سبب المشاكل بينا".

وأضاف مسلم: "صديقتي كانت بتسخن طليقتي عليا وتحرضها يعني مثلا تقول لها خليه يعمل كذا عشان كذا، وعلى فكرة أنا قبل ما أخطب حاولت أرد ميكا عشان خاطر ابني، لكن صديقتي اللي بتكلم عنها دي كانت بتقولها حاجات غريبة زي مينفعش يرجع لك غير لما يكتب حاجة باسمك".