محمد سامي يعلن اعتزال الإخراج الدرامي ويكشف عن السبب

أعلن المخرج محمد سامي، اعتزاله إخراج المسلسلات الدرامية، موضحاً أن مسلسل إش إش هو آخر الأعمال التي يقدمها.

اعتزال محمد سامي

وأعلن محمد سامي اعتزاله، في منشور كتبه عبر حسابه الشخصي على تطبيق فيسبوك جاء فيه: "وداعا الدراما التلفزيونية. السنة دي كانت آخر أعمالي التلفزيونية، واللي فيها بودع المسلسلات، رحلة طويلة حوالي ١٥ سنة، قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير ومع شركات وقنوات كلها مهمة، وكان دايما الجمهور بيشجعني، سواء بردود الأفعال أو بتصويته ليا في الجوائز، وأي نجاح حققته كان بفضل ربنا والجمهور".

وأضاف المخرج الشهير موضحًا الأسباب: "يمكن المقربون ليا عارفين إني واخد القرار ده من فترة وهو اعتزال الإخراج التلفزيوني، ولكن كنت أنتهي من التزامات موقعة مع شركات و نجوم والحمد الله انتهيت منها، وكان آخرها 2025".

وتابع مخرج مسلسل إش إش متحدثا عن أسباب اعتزاله: "معنديش حاجة أكتر أقدر أقدمها في التلفزيون، وخايف من تشبع الجمهور من أسلوبي، ومن الوقوع في فخ التكرار ودائرة المتوقع والملل، والوحيد القادر علي الدوام هو الله وحده، الحمد لله أخر عملين ليا إش إش وسيد الناس حققوا نجاح أنا سعيد بيه، كل يوم بلدي العظيمة مصر بتطلع صناع جداد موهوبين ومثقفين، ويقدروا يقدموا أفضل من اللي قبلهم، وهنفضل طول الوقت بنقدم أعمال مصرية يلتف حولها الجمهور العربي، بشكر كل حد ساعدني في الرحلة وبشكر كل زميل منافسته كانت دافع للتميز".

اعتذار محمد سامي

وقدم محمد سامي اعتذاره عن أي مشهد لم يلق استحسان الجمهور قائلاً: "أعتذر عن أي مشهد قدمته أثناء الرحلة، ولم يلق استحسان الجمهور أو إعجابهم في الآخر الفنان دايما بيجرب والفنون جنون زي ما بيقولوا".

وكشف عن اتجاهه للدراسة في الخارج لمدة عامين قائلاً: "أدعو لي الفترة الجاية عندي سفر خارج مصر لفترة عامين بتعلم فيهم حاجة جديدة بدرسها، حاجة كان نفسي أتعلمها من زمان، وأجلتها كتير لحد ما لقيت نفسي بكبر و خايف يفوت العمر قبل ما أعمل حاجة نفسي فيها، مقتنع إن الشخص يقدر في أي وقت يقرر يوقف حاجه بيحبها عشان يعمل حاجة تانية بيحبها برضه، و عايز يجربها بس محتاج عيلة تسانده على اتخاذ قراره".

واختتم محمد سامي بيان اعتزاله بأمنيات التوفيق للفنانين قائلاً: "كل التوفيق لكل زمايلي وبحبكم وبشكركم علي سنين المنافسة الجميلة اللي عملت أسماءنا كلنا، وأتمنى لنفسي التوفيق في الخطوة الجديدة".