قصائد مبارك الحجيلان

مبارك الحجيلان هو شاعر كويتي ونجم برنامج شاعر المليون، وهو من الشعراء القلائل الذين يحملون راية الإبداع والشعر، ويحاول أن يضع أسسا جديدة وآراء جديدة في الساحة من خلال ما يقدمه من شعر نال به إشادة الكثير من المتابعين في الساحة الشعبية.

قصيدة تاج الملوك

خلصنا وانتهى عذب الغرام ولا كسبت ارضاي

عجزت ولا قدرت اوصل شعورك واكسب اعجابك

أشوفك شايف ٍ غيري وأنا من سبّتك بلواي

كأني لا طرقت الشوق جاني ثاير ٍ بابك

أجيك ويرتبك شعري وأشوفه يعتزي باشفاي

وأحس اشفاي تحرجني وأراجع وأحسب حسابك

أجيك بكل ما فيني قصايد وارتعاشة ناي

وتجيني بارد الكلمة والأبرد منه ترحابك

عجبك الحاسد الواشي وأسميها جهالة راي

نسيت اللي نذر عمره لأجل يعطيك .. ما سابك

أبيك تشوف كم مرة نصحت ولا سمعت احكاي

وأنا ضايع مثل عطر ٍ يضيع بزحمة أطيابك

خلاص الليل من همي هجرني ما يبي شكواي

وخلاص الغيم ما وده يزف الخير لأعشابك

حبيبي رد لي ضحك السنين وبسمتي واغناي

وأبي كل القصيد اللي من أول عانق اترابك

أبي شعري وأبي وقتي وأبي ضحكي وأبي ممشاي

وأبي وان كانها فرقا دموعي سبة اغيابك

أبيها كانك بترحل قبل لا تنزعج وياي

قبل لانهى معزتنا اوأهين القاف وابدا بك

وأبي تاج الملوك اللي لبسته من سنين اصباي

تذكر يوم أماري بك وأبيع الناس باسبابك

تذكر يوم تغليني وتبكي لا لمحت ابكاي

ولا تزعل من أطباعي لو أمشي وآخذ ألعابك

حديث اصغار .. والضحكة من أقصى خاطرك وأقصاي

وأجي بالعيد أسولف لك وثوب العيد يزهابك

طفوله عشتها حلم ٍ تحقق رغبتك بحماي

تنام الليل في جوفي وأنام الليل بأهدابك..

وأقوم الصبح أنادي لك وأسابق خطوتك باخطاي

إلين الشمس ما تسدل ستار ٍ يشبه احجابك

يمر اليوم في فرحة مدامك سلوتي وامناي

وأنام وصورتك حلم ٍ يزور القلب وأصحى بك

أسولف للألم عنك لأنك حيلتي وادواي

وأسولف للأمل عني لأني أصدق أحبابك

ربيت بداخل أسرارك وأضنك ساكن ٍ باحشاي

وأظن الفرحة بقربي .. شعور ٍ كان ينتابك

زمان(ن) راح بايامه حديثه للزمان الجاي

وانا ما ودي ارجع له اخاف يثور اعصابك

عليك إنك ترد اللي سلبته من شقا دنياي

وأنا عهد ٍ عليّ لاترك دموعك تغسل اثيابك ^[1]  

قصيدة دمعة رجل

لا شفت لك دمعة رجل شوف الاسباب
لا تقول عيب ولا تشمت بحاله

وده يخبيها وخآنته الاهداب
وتفجرت من يوم شي طراله

ما طاح دمع كنه الوبل سكاب،
إلا من اللي داخل الصدر شاله

رجال تبكي دم من فقد الأحباب
ورجال تبكيها حياة الرزاله

وترى الظروف تخلي الشخص مرتاب
يصير به مثل الجنون انفعاله

ما هو جنون إلا بعد حرقة أعصاب
ومن وين ما طق الهدف ما صفاله

لا راتبه يكفي ولا الحظ به طاب
والا تدين ضيق الدين باله

وتدري متى يفرك لك الناب بالناب
لا صار عاجز والتفت في عياله

دنيا غريبه والبشر صاروا أغراب
أغراب … لأن الناس كل بحاله

من أول الطيب ترزه بالأنشاب
واليوم لا … اللي يرزه رياله

وشلون أردى الناس يصبح له أنياب
يا وقت ليه الظلم وين العداله

ويا صاحبي اللي بك الظن ما خاب
لا يضيق صدرك وأنت راعي الشكاله

بكره تزين وتنفتح كل الأبواب
ما فيه بقلوب الرجال أستحاله

مشكلتك أنك رايح لشخص كذاب
ليته تعذر يوم جته الرساله

يركض ويدفع للمظاهر والألقاب
وعلى بني عمه قليل وصاله

أقسم قسم بالله يا بعض الأقراب
يا قربهم كنه على الكبد عاله

وأقسم قسم بالله يا بعض الأجناب
تحرجهم من زود الكرم والجماله

جنب أبو ما أقدر وأبو أكتب كتاب
وأزهم أبو لا شاش طوح عقاله

رح للكريم اللي يحسب لك حساب
يا من نهض لك ثم ردت سهاله

اللي ليا غابوا أهل العذر ما غاب
والله يبارك في حلاله وماله

ولازم تميز بين نشمي ونصاب
من قبل لا تكتب لأي واحد رساله

ولازم تميز بين نشمي ونصاب
من قبل لا تكتب لأي واحد رساله

بعض البشر يفرح على جية أصحاب
والبعض لا شاف الخوي ضاق باله ^[2]  

قصيدة رفيقي

دام امنياتي وراها قوة الباس
لابد عقب التعب / فرحه عظيمه
بي عزم ماله حدود ،، وماله قياس
وفي صدر الايام لي قدر وحشيمه
الانتكاسات : تهزم ليّن الراس
والانتصارات : من صنع الهزيمه،
رفيقي لايزعجك حاقد وبلاس
ماضيع المجتمع / غير النميمه
والناس ويا القوي معروفه الناس
لو الضعيّف يجاهد من صميمه
بتشوف الاحباط والصده والافلاس
لعطيت شخصٍ كسربك ربع قيمه
ولا تصير لامن نوولك شلة انجاس
حساس / طنش لو الضربه أليمه
بقول إلك شي حطه / بين الاقواس
خذها من القلب يامال الغنيمه،
إليا احرموك الشجر لا تكسر الفاس
علمهم إنك / رجل مبدا وشيمه
ولا تثني العزم لين إنك تجي راس
ولا يحقق الحلم / ياكود العزيمه ^[3] 

قصيدة وجيه متلونه

ماعدت أنا ذاك واحاتي لموقف صغير
وماقمت أثقّل على نفسي / بتفكيرها

هو ليه أفكر بهالعالم / وأحث المسير
وعقول بعض البشر ياصعب تفسيرها

نصدق ونطلع خطا نطلع خطا بالأخير
ويعاتبونك على نفسك ،،، وتقصيرها

لو تعطي الراي قالو فيك : هذا يغير
تعطي نصيحه ،، يحدونك لتغييرها

ولو تفرش الأرض ولخاطر بعضهم : حرير
بيقول هالارض مابيها ،،، أبي غيرها !!!

امن اول استغرب لحاجات وابحث كثير
واضيق من سالفه / واحط تبريرها

واليوم قانع من اللي صار ،،، واللي يصير
ماني وليّ الاوادم ،،، في تدابيرها

اوجيه تحمل وفا ،،،، تبشر بودٍ كبير
ووجيه متلونه / تبشر بتحقيرها ^[4]