قصائد ماجد النصيف

يمتلك الشاعر المبدع ماجد النصيف - من المملكة العربية السعودية - خاصيتين جميلتين تضافان إلى موهبته الشعرية المتميزة، قدرته الفائقة على التحكم بتدفق مشاعره، وتكثيف فكرته واختزالها في أبيات قليلة، والأخرى هي امتلاكه لعين الناقد الحصيف الذي يرصد سلبيات المجتمع والحياة ويُعالجها برؤية تتسم بالجرأة والعمق.

قصيدة يا ماجد

يـا ماجـد الدنيـا عطتـك العراقيـب
راحـت وخلتـك تعـدي فـي مكانـك
لو معـداك اليـا عديـت معـدا ذيـب
ماكان ذا ضربـك و ضـرب اعديانـك
وين انت من عمر النبي نوح و شعيب ؟
واشيب عينـك عـان موتـك وزانـك
وهن العظم منك وغزى راسك الشيـب
غلطتـك والا عـاد غلطـة زمـانـك!
تطلع عليك الشمس مثل امـس وتغيـب
وانته علـى مانتـه بشينـك و شانـك
واليـا ضـواك الليـل ليـل الهناديـب
مافيـه احـد مايشتكـي مـن لسانـك
عذربـت فينـا وانـت كلـك عذاريـب
ولا تمـل مـن الـجـدل و المحـانـك
فقر و ردى حال و همـوم و عواقيـب
و تزايد العربـان عانـك, و عانـك! ^[1]  

قصيدة شغّل يابو ثامر قدم يسري الليل

شغّل يابو ثامر قدم يسري الليل نبا نزور اللي للأنظار لافت
عبدالله ابن عون ذخر المشاكيل اللي ليا جيته جروحي تشافت
اللي يحط الحشو والعود والهيل وبيته علاه امّة محمد تهافت
ابرك لنا من مجلس القال والقيل ومهبّلٍ ماضيّفت واستضافت
ليا جوهم الاجناب ولا الرياجيل قامت بعضها في بعضها تلافت
ياحيّ نور البدر عقب القناديل وّطلعت قمراه والعين شافت ^[2]  

قصيدة الغاوين

ياللي تفاخر بالمواتر وبالبيت
واعزتيلك كان هذي مراجلك
بكره ليامنك بقبرك تساويت
هذي وهذي كلبوها ماهيب الك
منته بماخذ معك لامنك اقفيت
الا عملك اللي يحدد منازلك
ولا باقيً لك غير سمعتك والصيت
بفعولك اللي عند ربعك تجملك
وابا انصح الغاوين ما دام غنيت
وانا على القيفان يجذبني السلك
يا لادمي مهما وصلت وتعليت
انهايتك للدود بكره بياكلك
مير اعتذر للناس لامنك اخطيت
وليّن لهم جانبك واحسن تعاملك
واعرف ترى الايام مهما تهنيت
بالوجه الاخر في اي لحظه تقابلك
واخوك لو انك بضفه تذريت
يومين والثالث ما هو بمتحملك
عن فزعة العربان في كل توقيت
يا زين فزعة خالقك مالك الملك ^[3]  

قصيدة يا وجودي

يا وجودي وجد من تاه في نص الطريق!!
وكل دربً يسلكه قام يرجع به ورى؟؟
في همومه والمشاكل نشب مثل الغريق!!
وكل يوماً جرح والجرح الأول مابرى؟؟
شاف له شيً بسنّه وبسمه مايليق!!
الليالي طول عمره تحاربه اجهرى ؟؟
‏ولا شكى باللي يحسّه لبن عم وصديق!!
ولا حداً باللي يعانيه غير الله درى؟؟ ^[4]  

قصيدة من ضيقة فالصدر

من ضيقة فالصدر لي عدت أيام
تقول روحي من جسد متبري
ما كني إلا للي تولته الأوهام
والكل شي من الزمان متحري
وحزنن يجيني كل ما خذتلي عام
علي يشوف عقب شبت متجري
بذات وقت الليل ليا جيت بنام
بين الحنايا لج صوتن مسري
تقول شيلت واحدن من بني يام
ولا عادي ما قيل مسحوب مري
بسباب غرورن جالعن قلبي قام
بالحب ما صرح لكنه يطري
عليه جسم غير عن كل الاجسام
مهما لبس! من لبس قلت متعري
وعلى كثر ما شاف من خير وانعام
جميع مايكل بجسمه! يمري
على المفاصل! كنه يربط حرام
والجلد كنه داهنه سمن بري ^[5]  

قصائد قصيرة

• قصيدة ملل
  يا اللي على الشاشه ترزّز من العام
  إسمع نصيحة واحد صافطٍ لك
  كثرة ظهورك في قنوات الاعلام
  ماهوب طيبٍ ينكتب في سجلك
  لو إن شِعرك مثل شعر ابن وسام
  أخوك وهو اخوك بكره يملك
  وان ضعت إسأل لا تضيعك الاوهام
  وتلقى لك إنسانٍ مجرّب يدلك
  خطوه لو إنه كل يومين قدّام
  ولا ألف خطوه وأنت واقف محلك

• قصيدة موت حلم
  تدري وش اقسى نوع فأنواع الآلام
  وأقسى من آلام الخيانات والظلم؟
  تقضي حياتك كلها في رجا أحلام
  وتموت ما حققت منها ولا حلم

• قصيدة كلش يبكينا
  ليا أصبح الصبح هللنا وسبحنا
  وقمنا ندوّج يسار الأرض ويمينا
  اندور الرزق وندور مصالحنا
  ولا عاد نرتاح لين الليل يمسينا
  شمس القوايل ماغيرتٍ ملامحنا
  وشاينتن أخلاقنا وكلش يبكينا
  عمارنا وصلت الخمسين ما ارتحنا
  ما نجمعه في شهر جمعه يمشينا

• قصيدة قوه
  بعض العرب جيّته لا جاء تشرفني
  وأفرح اليا جاني اللي يقدر الخوّه
  وان جاني اللي ليا جيته يصرفني
  صفقته بكل ما أوتيت من قوّه!

• قصيدة تمييز
  يا اللي تقول الوقت جا فيه خله
  الوقت هو الوقت والناس هي هي
  والطيب ما هو بالتطبع اجبله
  وكم واحد ذكره بعد موتته حي
  ومن يرمي التهمه على غير أدله
  لابد ما يكوى على غاربه كي
  حنا كبار وكل درب ندلّه
  ولنا عقول تميز الحسن والسي
  ودخولنا في بعض الاشيا أقله
  إن ما خسرنا شي ما نطلع بشي
  وتجاهلي بعض الأوادم من الله
  ما هي بشوفة نفس وإلا كِبر في
  أحب انزل كل شخص بمحله
  ولا آحب أجي لي في محلٍ مهوب لي

• قصيدة مفاهيم
  أثبت لك اكبر دليل إن الزمن جاحد
  وان المفاهيم عند الناس مختلطه
  أفعالنا الصح يلغيها غلط واحد
  وأفعالنا الصح ما تلغي ولا غلطه

• قصيدة مظلوم
  يا مغني بفضله فقر كل محروم
  يا من بما يخفيه الإنسان عالم
  أسألك تفرج ما بصدري من هموم
  وترد لي من راح غانم وسالم
  واسألك تجعلني على طول مظلوم
  ولا آكون في يوم من الأيام ظالم
  واسألك ترضيني بما هوب مقسوم
  وأكون قبل الموت للموت والم ^[6]