قصائد الشاعر طلال حيدر

طلال حيدر هو شاعر لبناني - ولد في العام 1937 في مدينة بعلبك في البقاع اللبناني - حاكى بقصائده الطبيعة التي يراها بعين الشاعر المتعمّق في جماليّات وتفاصيل الذات الإنسانية الرّيفية البسيطة وعلاقتها مع الطبيعة السحرية، كصوت خرير الماء وزهر البيلسان، وقد غنّى لطلال حيدر كبار الفنّانين في لبنان، مثل فيروز ومارسيل خليفة وأميمة الخليل ووديع الصافي ونجوى كرم وغيرهم. ^[1]  

قصيدة فلسطين

نمتِ
فْتَكْروكِ ولد غفيان
تحت الميّ
قرّبوا منك يحاكوكِ
لقيو بُحيرة ميّ
وجّك متل رجعة ولد
بعد الغياب
وجّك متل تلّة
وعم تصرخ دياب
يا عُمْر
ما بيلحق يجي تيروح
وجّكِ
متل بيرق عزا
من بعيد عم يلوح
انت
بيت أهلي
وَرد عم أرفعو
ت سيّج الحقلي
انتِ بلاد مقوّصة
وعم تِنقتل قبلي
انت
وهَبِّط يا منام
ووعيا متلي
واقف على سهل البقاع
ملثّم بشمله
بصرّخ
وصوتي ضايع
وقالوا الهَوا ِقِبلي
يا بيت اهلي
يا سْطَيْحات الحمام
يا دَعْس عالي
فوق تلجات المنام

قصيدة فخّار

نيّال فخارا لهالجرّه
فرحان عندو عيدْ
بيشرب ع طول نبيدّ
ومِدري خدودو ليس محمرّا
تِخمين بَوّس شي مرا سمرا
تِمّا غِفي ع تمّ هالجرّه
شو كنت يا فخار قبل بهالدني؟
كمشة تراب وعشت ما صرلك سني
لمّن جبلتك خابيي حمرا
تا عتّق نبيداتنا للعيد
متلك انا
كنت بزماني طين يا فخّار
صدفه مرق الله جبلني بدمعتو بالنار
وَشْوَش بإدني وطار
وقللّي انت فخار
يو جرّا
وشو نفع هالجرّا
لو نِشفتْ الخمرا؟
هيدي الدني اسرار
بكرا إن صرتْ خِتيار
وعَنّت ع بالك شي بِنت سمرا
يا صاحبي تذكر انت فخّار ^[2]

قصيدة كحل العين

هـ الأرض جايي مدودخه

بتهزّ ع الميلين

ع كتر ما هي خفيفه

بيحملوها تنين

وزغيّره

طير الحمام بيقطعا بيومين

ع قد منا زغيّرة

خمنتها بعدين...

جبتلّها شمس وقمر من سكر

ونجمات زرقا معلّقا

بترد عنها العين

ع قد ما سُكرا حِلو

بيلبقلها إسمين

دقت على باب الزمان

مضيّعه ليلين

تتسألو ان كنن إلو

قام ضيّفا نهارين

وقللي الزمن ما تقلّها

صاروا كحل بالعين.. ^[3] ​​​​​​​

قصيدة قطفولو ورد

متل ها النسيان جايي من السهول

الحب.. متل الموت

وليالي الضيعة بين الحجار تقول

رح يوصلّون هالصوت .. ؟

تحت الشتي عم ينحنو يقطف وراق النار

ابكي عليهون يا عتبة الدار..

قوليلهون فلو قوليلهون ضلو.. والليل بيفتح قمار قمار

والفلاحين الطالعين من الندي بيرنخو.. أرض المنام الباردة..

بعدون عا الورقات زخات الشتي

فرو هاالعصافير وضل لحالو يغني الزمهرير

قطفولو ورد للنسيان

الموت عم بيشكشك وراقو عا شريط الزمان .

هل كان عندون بيت ..

وصورة عليها ناس معلقين بخيط

وقعو عن سطوح العمر وسلقتون الحجار

وقعو متل ما بيوقع المشمش عا الولاد الصغار

وين أهلي وين طاحونة حزن خيي الصغير

وين طيارة ورق نومي عا هزت سرير

وين الأيدين الحطت بريق الشتي فوق الحصير

وين اللقي راسو عا أيدي وصفن .. وطلع وعلى كتير

وين شبابيك الي فات منها الصوت متل الزمهرير

وين .. رمان السقف مقطوف ومعلق متل عمر الكبير

ولك عن يا قلبي متل ها النحل جوات القفير

وقع العمر ما بين أيد وبين هزات السرير .. ^[4]  

قصيدة ركوة عرب

أحلى من الركوه

على منقل عرب

أحلى من الفنجان

حلوه

متل عُبي القصب

خيط القصب تعبان

جيبوا حدا من دمر

يدقدق وشم

جيبوا من الهامة

والوشم

بن محمّص وهب الهوا شامي

غمازة لعالخد

ماإلها إسم؟

والخد قدامي

ومكحلي ...

والكحل راسمها رسم

مين لبرا قلامي

ومشنشلي متل الفرس

والسرج خيّالي

بإيدا أساور من دهب

بتخش

بتخش؟

بيدور الطرب ليوم القيامة.. ^[5]  

قصيدة مشتاق

إيديّي غمر مفتوح متل النون

معجّل

متل جملة ما فيها سكون

ولا بنهدى

والوقت ما عنده وقت ينطر حدا

يمكن أنا مجنون

هيّ ِ

متل شي خط بريشة قصب

وهوّ ِ

متل حرف العرب

مرفوع بالضمة

منصوب بالفتحة

وبالفتحة هرب

بس يكتروا ببالُه

بيصير واو ونون

وبس يسكن بحاله

بيصير همزه

أو بيصير سكون

قرآن مفتوح بهدا

متل المصلاّية

نقّوا شي سوه هينه

تنبلش قرايه

وعبله على ضهر الفرس

حلوه متل آيه

كل الحروف منكسّه

إلا الألف رايِه

ألله شو حلوه الألف

بس تنحكى حكايه

سبعه لغات العرب

عندي مخباية

ع كتر ما القوس انحنى

صار السهم غايه

هـ الأرض

اسوارة دهب

زينه مضوايه

جبلي بطريقك حلق

إدني.. معرّايه

وصيت صايغ حلب

قللي الحلق جايي

وضاعت

يا مين يلاقيا

وياخد هـ المرايه ^[6]  

قصيدة يا رايح

يا راعي القصب مبحوح
جايي ع بالي شروقي
قلّو للقصب ما يبوح
بالسرّ اللي بعروقي
وإن ضعنا سَوى بهالليل
خلّي صوتك مسموعي
يا رايح صوب مشرّق
مشرّق ما يا بو ربيعي
راحوا يرعوا غنمهن
والعشب فوق ضلوعي
وإيّام الـ غابُن وِلفي
لعُدّن ع صابيعي
وعتّم علينا يا ليل
وضِيعي يا حلوة ضيعي
قالولي إنّي عشقان
وأني مش داري بحالي
بين الصاحي والغفيان
لمحت خيالِك قبالي
كان الصبح شِنّو بان
وآدان الصبح عالي
ونازل من صوبُن مرسال
من عيني نزلوا دموعي

قصيدة ميّ

بتلبقلك المي
لا تموتي
اْغرقي بالمي
تيصير موتِك نَعَس
وتْصير
شمسِك فََيّ
خَوفي عليكِ تِكبري
وخوفي على حالي
رح تنزل عليّ الدني
و يتغرّق خيالي
ون كان
لا بد وغنى ورح ترحلوا
مَحّوا الطريق
مرسوم ع الحيطان
ولد حفيان
راكض بالحريق
قومي نْعسيلُه يا دني
بلكي إذا نْعِستي
بيفيق ^[7] 

قصيدة غزالة الروح

 أول ما شفت الروح
خمنت الخريف
بس علق تيابو الهوا بين القصب
قالوا حفيف
وبس رف قلبي، ما حدا سمع الرفيف؟!
متل الدني أنتِ
غزالة سارحة ونوما خفيف
منديل الغطيطة ع ريف العين
عالي، وعم يلوح لتاني ريف
عيونك فيهن ريحة شتي
ومراية الدمع
شفت الطقس كيف
م دامها حلوة، بكل نهر المي
سألت البحر جاب الملح من وين؟
سألت الدمع
قللي: سآل العين
ليش دارت الأرض؟
شو شافت بالمراية؟
مين ما فتح بواب السما عليها من الميلين
بس عنَّ ع بالا القمر
دارت لحتى شافتو قمرين
تاري المراية بتنكسر
وبتصير فيها كل صورة تنين!
خلو الشتي بالغيم، بلكي تأخروا الرعيان
بس يوصل الصوت بتجركن الوديان
باقي على وج الصبح من الليل يللي كان
متل ما بيبقى من البن ع الفنجان
والوقت قد ما ركض رح تلهت الغزلان
يمكن تكون مدورة هـ الأرض
ع قدّ الزمان ^[8]