فنانة مصرية تتهم محمد صبحي بمنعها من التمثيل بسبب كلمة قالتها

الفنانة عبير صلاح الدين من أشهر الفنانات في بداية الألفيات حيث أدت دوراً رسخ في أذهان الجمهور وهو دور عبلة في مسلسل يوميات ونيس والذي كان من بطولة الفنان محمد صبحي.

وبعدها اختفت عبير صلاح الدين عن الساحة الفنية فجأة وتركت ورائها العديد من التساؤلات ، بعدها تفاجئ الجمهور بأنها قد هاجرت إلى كندا تاركه الفن على الرغم من موهبتها الكبيرة.

وخلال  لقائها في برنامج "كلام الناس" مع الإعلامية ياسمين عز، صرحت عبير صلاح الدين بأنها بعد تقديم دور عبلة في عدة مواسم شعرت بأنها لن تستطيع تقديم أي جديد يخدم الدور حيث قالت: «رفضت استكمال تصوير باقي أجزاء مسلسل ونيس، شعرت أني لا أقدم جديد، من حقي كممثلة أرفض الدور لو مش حاسة أني هقد جديد، وانا مش هحرق الشخصية بعد نجاحها، لأني فنانة بحب فريق العمل والمصداقية عندي اهم شئ».

وأضافت « ماكنتش قادرة اعمل كدة لان الممثل مش آلة هتدوس علي زراير يشتغل لآ لازم يكون في إحساس، زملائي الفنانين حذروني، قالولي كدة مش هتشتغلي وهتقعدي في البيت، لكن أنا قلت الرزق بتاع ربنا وحاولت كتير لكن كل البيبان كانت متقفلة، لحد ما جالي اكتئاب خمس سنين من 2010 لحد 2015، وكل المحطات بتتقفل في وشي».

سبب هجوم محمد صبحي على عبير صلاح الدين 

وأوضحت عبير صلاح الدين أنها تعرضت لهجوم عنيف من الفنان محمد صبحي بعد اعتذارها عن استكمال الدور في مسلسل يوميات ونيس حيث قالت: « محمد صبحي حاربني لأني قلت لا، هو حارب نجوم غيري كتير ولو لاحظنا هتلاقي إن الناس اتغيرت في مسلسل عائلة ونيس من أول جزء لحد الجزء السابع، ودا لأن اللي بيقول لا او بيزعل محمد صبحي بيموته في الموسم اللي بعده وبيسفره.

وأشارت عبير أن هناك الكثيرين الذي نصحوها وقتها بأن تعتذر للفنان محمد صبحي حتى لا تحرم من الفن فيما بعد لكنها رفضت واضافت: « نصحوني اعتذر لمحمد صبحي علشان مقعدش في البيت، ولكني مش ندمانة ومش هعتذر لأني مغلطتش ودا حقي كممثلة إني أقول لأ، وبدأت احس بحاجة من نوع انا اللي عملتك من غير ماتحسي».

عبير صلاح الدين تهاجم محمد صبحي

ومن جانبه وجه الإعلامي محمد الغيطي من خلال برنامجه التلفزيوني سؤال للفنانة عبير صلاح الدين بعد هجومها على الفنان محمد صبحي وقال:«مشتغلتيش مع غيره ليه؟».

وتابع :«عبير صلاح الدين من الفنانات اللي طالعين بقوة، بس مش فاهم ليه فجأة تشن حملة على محمد صبحي، طيب هو رفض يشغلك مشتغلتيش مع غيره ليه ؟، الموهبة الحقيقة لا تتوقف على منتج أو ممثل أو مخرج، أنتي لو موهوبة بشكل حقيقي كنتي اشتغلتي مع غيره يا عبير».

وأضاف :«كنتي أشتغلي مع أي حد تاني، مفيش مبرر لهجومك ده غير البحث عن التريند والشو، أنا اشتغلت معاه لكن مشوفتش منه اللي أنتي بتقوليه ده، هو ممكن يكون صارم، حازم، ديكتاتور، وصاحب الفرقة والمخرج لازم يبقى ديكتاتور».