زوجة يوسف الشريف تهنئ الزعيم بعيد ميلاده وتستعيد ذكرياتها معه

احتفلت المؤلفة ومصممة الأزياء، إنجي علاء بعيد ميلاد الزعيم عادل إمام ووجهت له أمنياتها بدوام الصحة، وكشفت عن دعمه لها في بدايتها قائلة: "هفضل فاكرة كلة كلمة في الحوار".

 وقالت إنجي علاء في منشور لها على موقع التواصل الاجتماعي فيسبوك: "مرة منتجة اديتني ميعاد في استديو تصوير.. المهم وصلت ودخلت استناها في غرفة استراحة واتأخرت عليا شوية وببص لقيت الزعيم عادل إمام داخل الاوضة ومعاه مساعد إخراج بيراجع معاه مشهد".

 

 وأضافت إنجي علاء، مصممة أزياء أبطال مسلسل النهاية، لزوجها يوسف الشريف: "انا طبعا ماصدقتش نفسي لما شفته.. في الحقيقة له هيبة فظيعة.. المهم لما خلص بصلي قالي "انتي مين"قلتله انا مؤلفة وعندي ميعاد هنا بخصوص مسلسل هكتبه.. قلت مثلا هيقولي بالتوفيق ويمشي.. وهبقى اكيد فرحانة اوي وكفاية اني قابلته.. انما لقيته اهتم جدا وبدأ يكلمني عن فن كتابة السيناريو بتفاصيله ورشحلي كتاب اقراه وقالي انه هيفرق معايا وحكالي قصته مع الكتاب ده وفضل يكلمني في أمور فنية كتيرة وانا لسة مش مصدقة نفسي".

وتابعت: "انا خرجت مبسوطة اوي يومها بالرغم من ان المسلسل اللي رحت عشان اتفق عليه ماتعملش وقتها.. بس الحوار الفني الدرامي اللي دار فضل معلق معايا.. مجرد ان نجم كبير بالتاريخ الفني العظيم ده يديني نصايح في شغلي هي حاجة كبيرة اوي بالنسبالي وهفضل فاكرة كلمة كلمة من الحوار ده طول عمري.. حقيقي رب صدفة خير من ألف ميعاد (٢٠١٧ - استديو النحاس)
كل سنة وانت طيب يا زعيم ويارب دايما ناجح وفي احسن صحة وحال".

إنجي علاء

إنجي علاء هي زوجة الفنان يوسف الشريف، قدما معاً العديد من الاعمال الدرامية، وتشارك معه في المسلسل الأخير، النهاية، بتصميم الأزياء للشخصيات.

 وعملت إنجي علاء مع زوجها يوسف الشريف 9 أعمال من بينها الصياد، ولعبة إبليس، ليكون مسلسل النهاية الرمضاني، هو عاشر تعاون بينهما.