دردشة مع الدكتورة سماح.. صحة الطفل قصة وتوعية؟

•  طفلة عمرها ٨ سنين اجت عالإسعاف بشكوى وجود دم بالبول، الطفلة منفوخة رجليها.. وصرلها يومين ما عم تبوّل.. نامت، فاقت وبولها فيه دم.. الطفلة مبين عليها تعبانة كتير، مسلولة عافيتها فعلاً.
• الأهل قلقانين والأم خايفة على بنتها يكون معها هداك المرض، لأنو تعب ونقص شهية ودم بالبول..!!
• اجا الدكتور ليعاين الطفلة فسأل الأهل : بنتكن كانت مرشحة شي بال٣ الأسابيع الماضية؟ طلعت الطفلة ملتهبين لوزاتها من حوالي ال١٠ أيام.
• هون اتطمن قلبو للدكتور وحاول يهدّي الأهل.

طلب للطفلة فحوصات عامة، تحليل بول ودم.. وتأكد التشخيص.. مع الطفلة مرض كلوي اسمو #التهاب_كبب_وكلية_تالي_للإنتان وهاد المرض شائع جداً عند الأطفال.

• طلب منهن الدكتور فقط ياخدوها للطفلة عالبيت ويريحوها رياحة تامة، ووصاهن يعملولها حمية ناقصة الملح ويشربوها سوائل بكمية محدودة تبعاً لحالتها، ويرجعوا عالمشفى بعد ١٥ يوم للتأكد من شفائها.
• طبعاً الأهل انصدموا أنو معقول كل هالتعب وما بدك تعطيها ولا دوا يا دكتور..!!

لك عالأقل حطيها حب الخمسمية ?

• وهي النقطة المهم نوعى حولها أنو وقت يبعتك الدكتور بدون دوا مو معناها الدكتور ما بيفهم ومانو شاطر..!!

ببساطة في أمراض بتنشفى عفوياً بدون أي تداخل طبي أو دوائي ?

• حرام تنعطى أدوية عالفاضي ومرضك بكون بس بحاجة وقت وراحة.
• النقطة التانية المهمة للتوعية هيي أنو وقت الدكتور يوصفلك كورس علاجي تلتزم فيه لآخرتو.. مو أول ما بتشوف حالك تحسّنت توقف من راسك وخاصةً لحب الخمسمية والصادات.. هدول بس وقفتهن بتقوّي الجرثومة فبتصير تضرب بشكل أقوى وتضرب مناعتك ويقعدوا الخبط ببعض وأنتَ بتاكلا ?‍♀️
• هالمرض الكلوي يلي حكيتلكن عنو غالباً بيشفى لحالو عند الأطفال بس عند الكبار بكون أسوأ للأسف.

المهم مدة الشفاء من هالمرض ١٥ يوم لهيك وقت يقلك الدكتور راجعني فراجعوا أكيد لأنو إذا التحاليل المخبرية بقيت مو طبيعية فهالشي بدو بقى خطة علاج عنيفة وقبول بالمشفى وصارت الكلية بوضع خطير.

انتبهوا عصحتكم وصحة أطفالكم ?

كنت معكم الدكتورة سَماح صالح محمد ?

تم نشر هذا المقال مسبقاً على بابونج. لمشاهدة المقال الأصلي، انقري هنا