حسام حبيب يرد على شيرين بعد استغاثتها منه ويهددها بالحبس

لم تمر ساعات إلا وأثارت استغاثة شيرين عبد الوهاب غضب حسام حبيب، ليرد على اتهاماتها، ويكشف مفاجآت عن الأيام الماضية، ويهدد بحبسها رداً على الاتهامات التي وجهتها له من بينها حصوله على مبلغ عشرين ألف دولار.

ونفى حسام حبيب اتهامات شيرين عبدالوهاب له، مرجعاً سبب استغاثتها المفاجئة منه إلى أنها تحاول الاتصال به خلال الأيام الماضية في محاولة منها للرجوع، إلا أنه يتجاهل اتصالاتها.

رد حسام حبيب

 وقال حسام حبيب في تصريحاته لموقع ET  بالعربي: "الحقيقة أنا مكسوف جداً من كل اللي بيحصل، ومش عارف أقول إيه عن اللي بيحصل، لكن أنا والله العظيم أنا بريء من اللي بيحصل، ممكن يكون دا حصل عشان خاطر هي بتحاول تتصل بيا بقالها يومين تلاتة وأنا مبردش عليها".

 ورداً على الإيصال الذي نشرته شيرين عبدالوهاب،  لإثبات تحويل المبلغ المالي لحسام: "دلوقتي بالمنطق كدة،  الورقة اللي شيرين بتقول فيها أنها حولت ليا مبلغ مالي، مكتوب فيها غرض التحويل لزوج، فأول حاجة كدا هو أنا زوجها!!، الحاجة الثانية حتى لو كنت الزوج وهي بتدلعني بالمبلغ دا إزاي تخرج تقول إني عايز أموتها، كدة فيه حاجة غلط يا إما هي كدبت لما قالت إحنا اتطلقنا أو كدبت على البنك، وقالت إني جوزها".

وأضاف حسام حبيب في تصريحاته: "شيرين كدة دمها تقل أوي والمرة دي بجد هحبسها، وهي خرجت النهارده وقالت الكلام دا لأنها لا تتوقف عن الاتصال بي حتى أمس،  لحد إمبارح بليل عشان نرجع لبعض، وأنا مبردش عليها، عشان انا رافض نرجع تاني بعد كل اللي حصل أخر مرة لما الأمر وصل للنيابة والحوار كبر، وفي الآخر علما زهقت من الموضوع كله عملتلها بلوك".

وتابع: "الموضوع مش بالعافية أنا مش عايز أرجع، وأنا اللي في سجن وعايز أتحرر منه، أنا اللي تعبت وأستحملت إهانات بقالي سنين على حاجات محصلتش، وعمري ما اشتكيت ولا أتكلمت ولا دفعت عن نفسي عشان ميطلعش شكلها وحش، بس خلاص كدا أنا فاض بيا، وكل حاجة هتتقال للناس زي ما حصلت بضبط، أنا عمري ما طلعت أسرار حد برا ولا عمري ما كنت هعمل كدا".

حسام حبيب يتهم شيرين عبدالوهاب بمطاردته

واستكمل حسام حبيب تصريحاته غاضباً، مؤكداً على أنه سيفضح الكثير من الأمور، ويكشف الحقائق للجمهور، وقال في تصريحاته: "هي اللي اضطرتني لكدة،  الحياة مش بالعافية أنا مش عايز أرجع لها، وأنا اللي يستنجد بالناس وبقولهم نجمتكم الكبيرة اللي بتحبوها من سنين كتيرة، عايز أبعد عنها ومش عارف، أتصرف إزاي وأستنجد بمين، وأنا بدعي ربنا قدامكم أهو يا رب عايز أبعد عنها يا رب ومش عارف أعمل أية".

 وعبر حسام حبيب عن معاناته مع شيرين عبدالوهاب خلال السنوات الماضية قائلاً: "أنا تعبت بجد وسنين من الظلم والإهانة وبسكت ومبردش، وكل الكلام اللي كانت بتقوله غلط كله، هو في حد يكون ضارب حد وفتح له دماغه، ويعتذر له عادي، وقبلها كنت حالق شعرها وتعتذر لي عادي، ويرجع له تاني، هو حاجة اسمها كدا، بتقول عشان بهددها!! بهددها بإية دا اللي هي قالته للناس أقوى من أي تهديد".

واختتم حسام حبيب تصريحاته قائلاً: "أنا إيه اللي عندي أهدده به، وأقول ربنا كبير لحد ما أضبط ورقي، وأكلم المحامين بتوعي عشان أعرف أحد حقي ومش هتنازل المرة دي خالص، وهاخد حقي بالقانون لأني عملت حساب للعشرة أكتر من مرة، وكل مرة بيطلع أكتر من اللي قبله، قبل أيام برضه عملت مداخلة هاتفية مع لميس الحديدي وشتائم وكلام كتير في حقي.. لا كفاية كدة".