بموقف يرويه لأول مرة: أحمد السعدني يدافع عن عبد الرحمن أبو زهرة

دافع الفنان أحمد السعدني عن النجم عبد الرحمن أبو زهرة بعد الهجوم الذي تعرض له من بعض الفنانات، منتقدين أسلوبه الحاد في التعامل معهم.

 واستشهد السعدني بموقف شخصي تعرض خلال تصويره فيلم يوم الكرامة، وكتب في منشوره على فيسبوك: "اول فيلم اعملوا في حياتي هو فيلم يوم الكرامه اخراج استاذ علي عبدالخالق كنت طالب في المعهد و كان عندي امتحان ٩ الصبح في الهرم و تصوير ٢ الظهر في بورسعيد قلبت الامتحان في ساعه و قلت عشان انجز اخد القطر لبورسعيد ركبت القطر ١١ و نمت و انا نايم كنت بحلم ان القطر كل شوية يقف و ناس تنزل و ناس تركب".

وأضاف: "صحيت حسيت اني نمت كتير ازاي كده و الطريق ساعتين تقريباً ببص في الساعه لقيتها ٤ العصر و لقيت الانتاج مكلمني ٣٤ مره و لقيت القطر واقف يحمل قمة الازبهلال مع احساس بالرغبة العارمه لعمل البيبي و من فتحة بقي اللي مخليا الست اللي قاعده جنبي شافت زوري تقريباً قالتلي مالك في ايه قلتلها احنا فين قالتلي في القصاصين ما علينا اني معرفتش احنا فين برضه قلتلها مش احنا رايحين بورسعيد قالتلي اه بس ده قشاش بيقف في كذا محطه احيه احيه اعمل ايه كلمتهم قلتلهم سمعوني ممن المنقي خيار المهم علي ما وصلت و جهزت الساعه كانت ٦ دخلت وشي في الارض و الاستاذ بيشرح المشهد".

وتابع: "كنت ميت من الجوع اكيد مكلتش من الصبح كان في ايدي سندوتش بضربه في الخباثه علي قدر الامكان و في لحظه و انا بستطعم الجبنه السايحه سمعت الاستاذ بيقول بريك يا جماعه عشان الاستاذ احمد بياكل بصيت علي احمد عز لقيته مبياكلش عرفت ان انا المقصود اللقمه وقفت في زوري ياسر جلال هبدني واحده علي ضهري بتوجعني لحد دلوقتي بس سلكت اللقمة قلت بصوت متحشرج لا يا استاذ انا خلصت الحمدلله قال اطفوا النور و قعدهم كلهم و قالي كمل السندوتش كملته و انت بطفحه طبعاً كاني ببلع زلط و اثناء ده استاذ علي اللي هو حبيب ابويا مسكني غسيل و مكوه من اللي قلبك ميحبهمش و بعد ما خلصت قالي خش يا حبيبي اغسل سنانك و ايدك".

واستكمل: "دخلت الحمام قعدت اعيط زي العيال بشحتفه و محمد رياض و ياسر قعدوا يرزعوا عالباب بره عشان افتح مبفتحش الاستاذ علي مسك المايك و قال اطلع يا ..... عايز اصور طلعت و عملت احسن مشهد ليا في الفيلم تقريباً ده اذا كان ليا مشهد حلو اصلاً بعدها الاستاذ خدني علي جنب و قالي انت محتاج تنشف و تتعلم اصول الشغلانه يعني الاستاذ كان بيعلمني و انا اتعلمت مكنش بيقهرني الرساله دي لكل واحد سولت ليه نفسه يغلط في الاستاذ الكبير عبد الرحمن ابو زهره الهي تنحشر اللقمه في زوركوا يا قللات الادب و التربيه"

عبد الرحمن أبو زهرة

يذكر أن عفاف مصطفى انتقدت تعامل الفنان عبد الرحمن أبو زهرة في كواليس تصوير الأعمال، قائلة: «مفيش ممثلة سلمت من لسانك ولا انتقاداتك طول الوقت، جاى دلوقتى تقول شغلوني وجربوني، طب مش تغير من نفسك أولا»، لكنها حذفته بعد أن تعرضت لانتقادات شديدة دفعتها للاعتذار.

#عبدالرحمن_أبو_زهرة #علي_عبد_الخالق pic.twitter.com/KEgK1LdoE7

— Ahmed L Saadany (@AhmedLSaadany) July 20, 2020