ابنة سعيد صالح تكشف قلبه الكبير بقصة تُبكي الملايين

قامت هند ابنة الفنان الراحل سعيد صالح بكتابة تدوينات عن مواقف خاصة جمعت بينها وبين والدها كشفت عن قلبه الكبير، الذي يحمل الكثير من حنان الأبوة.

إحدى التدوينات التي كتبتها، أبكت عدد كبير ممن تناقلوها على موقع التواصل الاجتماعي فيسبوك، حيث كتبت هند سعيد صالح قائلة: 

"أول ما تميت ١٨ سنة، كنت فرحانة أوي إني بقيت مادموزيل، وهطلع رخصة، وهجيب عربية جديدة.. كبسني هو وجابلي عربية 127، اتعلم عليها الأول.. اتعلمت وبقيت قردة في السواقة، وفضلت بيها حوالي سنتين. عربية جديدة بقى ورحمة أبوك يا شيخ.. قالي: حاضر.. إنتي كنتي قد المسئولية، وماعملتيش مشاكل بالعربية هجيبلك حاجة زيرو.. وجاب. مفيش يومين، وعملت حادثة محترمة، اتخرم فيها الرادياتير بلا رجعة.. أول مرة اخيب ظنه، ومش عارفة اعمل إيه!
دخلت قولت لماما: إلحقيني.. أنا خبطت العربية جامد عند الكبوت، والرادياتير راح في الوبا مع هنادي.. اعمل إيه؟ مش عايزاه يزعل مني ويقلب، ويقولي الناس هتقول بنت سعيد صالح ماشية بتخبط يمين وشمال ماهو طبعا أبوها اللي جايبها لها.
ماما قامت بدور الأم – وقتها- على اكمل وجه، ودخلت تتكلم معاه.
سعيد.. أنا عربيتي مكانش فيها بنزين، وكنت مستعجلة.. نزلت بعربية هند، وعملت بيها حادثة، والرادياتير مش هتقومله قومة تاني.. أنا مش عايزة ازعلها، ومش عارفة اعمل إيه؟ دي لسة جديدة وفرحانة بيها والغلطة غلطتي.
ونزلت الموسيقي التصويرية الحزينة، واتحركت مشاعر الأبوة بعنف.. دخلي الأوضة.. هند.. نعم يا بابا يا حبيبي.. أنا عربيتي مكانش فيها بنزين، وماما مكانتش موجودة، وكان في مشوار مهم لازم اعمله.. اخدت عربيتك.. بس أنا آسف والله أنا آسف جداااا، خبطتها من قدام والرادياتير باظ.. معلش اعذريني.. أنا متعود على العربيات الكبيرة، وأنتي عربيتك صغيرة، مكونتش متعود على أبعادها.. بس ماتقلقيش أبدا.. هصلحها لك بكرة الصبح إن شاء الله.
طب ده يتعمل معاه إيه والنبي؟!".