أحمد فهمي يكشف سر تأخره في الإنجاب في أول ظهور له بعد الانفصال

كشف الفنان أحمد فهمي الكثير من الأسرار عن حياته لأول مرة، في أول ظهور له بعد الانفصال عن الفنانة هنا الزاهد.

وظهر  الفنان أحمد فهمي مع الإعلامي أنس بوخش في حلقة جديدة من حلقات برنامجه ABtalks، ليتحدث عن الكثير من الأمور الحياتية ومن بينها سر تأخره على الإنجاب وتأجيل الخطوة.

 وقال أحمد فهمي إن تربية طفل صغير أمر خطير للغاية، كما كشف الفنان المصري عن معاناته مع مرض نفسي شهير.

 اضطراب القلق

وكشف أحمد فهمي عن معاناته مع اضطراب القلق قائلاً: "عندي اضطرابات قلق ساعات بتوصل لنوبات ذعر بس مبقتش موجودة مؤخراً.. وروحت لدكتور نفساني أتعالج لأن طول الوقت حاسس إني في امتحان وبطني فيها مغص يومياً من غير سبب".

وأضاف الفنان المصري متحدثاً عن المزيد من تفاصيل حياته: "في فرق ما بين تبقى مبسوط وما بين تبقى راضي، وممكن البني آدم يقعد سنتين يفكر فكرة غلط لغاية ما يكتشف إحنا بنضيع وقت لحد ما نموت”.

ورداً على سؤال حول تخيل لو كانت حياته عبارة عن فيلم فما الاسم المقترح، قال أحمد فهمي: "لو حياتي فيلم هسميها سمك لبن تمر هندي، وأنا نفسياً متقلب جداً على حسب المكان عشان كده ممكن الناس تشوفني غريب..  أنا بني آدم مش عايز حاجة أنا مش شخصية متطلعة، البني آدم اللي عايز دايما بيكون ضعيف مش قوي، فـ أنا حابب دائما إني مكنش عايز حاجة أو بمعنى أصح مش عايز حاجة من حد أنا متطلباتي بسيطة جداً”.

سر تأخر أحمد فهمي في الإنجاب

وكشف أحمد فهمي لأول مرة سبب تأخره في الإنجاب قائلاً: "أنا متأخر في الخلفة لأن تربية طفل من أخطر الأمور، الطفولة أهم مرحلة في حياة الإنسان وخاصة من سن سنة لـ10 سنين، أي حاجة بتحصلك في السن دا بتبقى زي خربوش في جسمك مش هيتغير، علشان كدا تلاقيني متأخر في الخلفة لأن التعامل مع الطفل دا أخطر حاجة ممكنة".

وأضاف: "في حاجات سلبية حصلت في طفولتي لكن دلوقتي فهمتها، كل شخص فينا جواه طفل لازم يعرف يتعامل معاه".

وكشف أحمد فهمي عن تجربة له قبل الشهرة في بداياته قائلاً: "لما روحت أمريكا وأنا عندي 20 سنة خدت شنطة ونزلت المطار الساعة 4 الصبح، وكنت خايف لكن كان حد مديني رقم واحد شغال هناك كلمته واشتغلت معاه في محل فاكهة وخضار وكنت بكنس وبمسح، وأنا طبيعتي بكره البرد جداً فكنت بدخل في تلاجة الخضار عشان اتدفى لأن درجة الحرارة جواها أقل من الشارع".

كما كشف الفنان المصري عن الكثير من  صفاته الشخصية وقال: "تعلمت إن أوحش حاجة في الدنيا هي الحوجة علشان كدا عمري ما بكسف حد محتاج مساعدتي أو أتعامل معاه وحش، عمري ما أقهر حد هو في احتياج ليا حتى بنظرة، وعمري ما أفكر إن حد شغال عندي عشان عيب جدًا، ودي كسرت الايجو جوايا وكنت شايف نفسي ناجح جدًا وقت الجامعة.. ولكن لما رجعت من أمريكا بقيت بفكر بشكل تاني خالص".

ويعد هذا الظهور هو الأول لأحمد فهمي بعد إعلان الفنانة هنا الزاهد لانفصالهما في منشور كتبت فيه: "تم الانفصال رسمياً بيني وبين أحمد بعد أربع سنوات زواج وربنا يكتب لكل واحد فينا الخير". إلا أن الفنان الشهير لم يتطرق في حديثه إلى انفصاله عن زوجته واكتفى بالحديث عن أبرز ملامح شخصيته والمزيد من الأسرار البعيدة عن انفصاله عن هنا الزاهد.