ممثلة شهيرة تكشف مميزات وعيوب محمد رمضان: كياد
قررت الفنانة فريدة سيف النصر، الدخول على الخط في أزمة الفنان محمد رمضان الأخيرة مع الفنانة سميرة عبد العزيز، وتدافع عنه بعد حملة الهجوم الأخيرة عليه.
أوضحت فريدة سيف النصر أن محمد رمضان مثل أي شخص له مميزات وله عيوب، ولكن في المجمل فإنها ما رأت منه إلا الخير بعد تعامل واحتكاك مباشرين معه.
عيوب محمد رمضان
كتبت فريدة سيف النصر ممهدة لحديثها عن محمد رمضان عبر حسابها على فيسبوك: "كلمة حق لـ رمضان.. حواديت حصلت قدامي، ما حدش يقول لي هتخسري جمهورك وانصحك ما تدافعيش عنه، نصيحة ما يعلقش أحسن علشان لا أنت ولا غيرك هتنفعني يوم وقفة الحق.. والساكت عن الحق شيطان أخرس، وكتم الشهادة نار تقيد في القلب تسوده".
تابعت سيف النصر: "وعنده عيوب آه لكن متربي واللي بيحترم أبوه وأمه بيحترم الكبار.. وولا حد يقول لي بتطبلي له والسبوبة خلصت.. يا بني الشغل اللي أنا اشتغلته مع كل النجوم الكبار يخليني أكره واحتقر الوسط واللي بيحصل فيه دلوقتي.. فمش عايزة تعليقات كلها هري وبس".
أضافت: "وتاني هو فيه عيوب آه وكلنا عيوب.. يللا وهقولها له لأول مرة.. عيوبك: عنيد.. صوته من دماغه، متهور، كياد، بيفرس ناس قهروه وبيظهر نعم الله عليه ما استعانش على قضاء حوائجه بالكتمان نصيحة النبي، وبيجيب لنفسه ولأهله القر، والناس اللي بتغير وتكره الخير للناس يتشالوا ويتحطوا من غير ما يؤذي حد".
استكملت فريدة سيف النصر: "ده ليه؟ لأننا مختلفين، كل الدنيا العالم الناجحين أوي بيفرحوا لهم إحنا لأه يردحوا لهم، هو كان فاكر زي ما بيفرح الناس هاتفرح له.. وقدامكم مثل محمد صلاح اتكرم في العالم كله في مصر لو ماكانش جري كان اتدمر خالص،يخرب بيت كده إحنا ما كناش كده جرالنا إيه دي في ناس بتدعي بزوال النعم ياساتر يارب".
أردفت: "رمضان غلطان في حاجات كتير ماشي من وجهة نظرك بس هو شايفها صح هو حر زي ما أنت حر.. في حاجات من غير قصد والناس حواليه ما بتاخدش بالها تدفع حاجاته في وقتها الشغل لاهيهم فانلاقيه كل شويه حد يسب فيه ده عيب في إدارته أو جايز حد قاصد ولا تعلم.. لاحول ولاقوة إلا بالله العلي العظيم.. ربنا ينجيك يابني".
مميزات محمد رمضان
تابعت فريدة سيف النصر: "قولوا اللي تقولوه.. لكن أشهد بالله العلي العظيم الحق العدل الشهيد وبالصلاة على رسول الله الصادق الأمين.. إن ما أقوله حدث عدة مرات أمامي، محمد يقوم لكل كبير سن أو أقدم منه في المهنة يحييه ويحترمه ويقول له أحلى تحية من نجم ميجا ستار للجميع.. مثل الراحل ريحان ويقبل يده ورأسه.. عارفة عبد الرسول ويبوس إيدها.. فواز.. حتى العمال الكبار.. محمد محترم جدا يا جماعة مع كل اللي حواليه.. بالبلدي غلبان، جواه الشاب اللي اتقهر وربنا اداله ومش فاهم بيتلطش ليه ده شغل ربنا وجواه عزة نفس عاجباني ما بينحنيش غير لله وبيصلي فاحترمته أكتر وتاني عنده غلط آه وكلنا بنغلط الله أكبر".
اعتذار رياض الخولي لمحمد رمضان بسبب واقعة طرده له
وكشفت فريدة سيف النصر واقعة طرد الفنان رياض الخولي، لمحمد رمضان قبل أعوام في بداياته، بسبب دخوله كرفان الملابس الخاص به.
وكتبت فريدة سيف النصر: "وعلشان تعرفوا هحكي حكاية بعد إذنهم جميعا هتعرفوا منها كتير.. قاعدين بنتفرج على مشهد وبنتكلم في الاستراحة ودخل حبيب قلبي رياض الخولي اللي هناني بأدائي في أعمالي ورياض معلم ونعلم جميعا قدر بعض ونحكي على الصعوبات وذكريات ومواقف.. وفجأة التفت لرمضان وقال له أنا زمان كنت أنت شغال معانا وكانوا جايبين لي كرافان، دخلت لقيتك بتغير جلابية والإنتاج سمح لك فروحت مزعق وقولت مين جاب ده هنا وزعقتلك ونزلوك.. وكمل رياض وقال له اوعى تكون زعلان مني رد رمضان وقال حقك يا أستاذ وأنا عمري ما ازعل من حق حد وحضرتك على راسنا وأنا والله مافاكر حاجة".
وأكيد ده اتكرر كتير مع محمد حاجات حكاها وحاجات لأه.. واهو بقى له معجبين في العالم ونجم وبطل ومحبوب وماديا ماشاء الله وده (رد ربنا ). .يوم انا بقي ما اتقابلت معاه لأول مره لقيت فراشة حلوة طيبة جت جري عليا وبوس راس وايد وترحيب وأخلاق وكلام طيب.. والله العظيم بشتغل مع عيال بمعني كلمة عيال سواء شهره او كم اعمال او جماهيريه من النوعين ذكر وانثي بتبقي بعيد عنكم ضربة القلب والغرور ياعين امهم فهمهم غلط ان التناكه بداية النجوميه والنجاح..لاه بيفشلوا بعد شويه.. يبقى نفكر بقى بالعدل..الجدع ده اللي قد ابني بالظبط..ربنا اداله ليه ؟بيحبب خلقه فيه ليه؟ إن الله عنود ولايعاند.. إيش دراكم اتعمل فيه إيه تاني..أنا بقول اهو كده كتير.. والله".
فريدة سيف النصر تنتقد سميرة عبد العزيز
تابعت فريدة سيف النصر تعليقا على واقعة الفنانة سميرة عبد العزيز: "السيدة الفاضله جيل فاتن حمامة وصديقتها الوحيده.. سميره عبدالعزيز.. احتراما لها لن أكذبها ابدا.. ولكن رسالة وصلت لك من مين أكيد يارمضان حد بيعزك اوي وخد موبايلك ده انت متحارب من ايام عشرين مليون ما يعرفوش الله أكبر اأجرك حاليا.. يعني كتمتي في قلبك 6 سنين؟ وبعدين دي مش شغلته إن حد يرفض دور فيتقهر ويكلمه يردح له.. يعني حتي لو حصل اشمعنى دلوقتي يا حاجة لا حول ولا قوة إلا بالله العلي العظيم".
أضافت: "أنا اتشرفت بيها وعملت معانا في مسلسل الرحايا أخت نور أبو دياب زوجي واتقابلنا كتير كانت مالية الشغل علينا أسالوا الجميع والله حاجه كده خيال بتتعامل حقيقي بأسلوب فاتن حمامة شوفوا بقى الرقي ما هو قول لي من تعاشر".
اختتمت فريدة سيف النصر: "ربنا يهدي الجميع لبعض ويهدي النفوس هو احنا بندور على مشاكل بأثر رجعي.. والله ما مستاهلة حقك عليا أنا ولو أن أقسم بالله قسم يتهز له 7 سماوات دي مش أخلاق محمد.. واللي هيقول سبوبة وقرف ورحمة أمي هزعل لأنكم حبايبي وعارفين أني حقانية وما بياخد الروح إلا اللي خلقها.. وأشكركم".