قصائد لافي الغيداني
لافي بن حمود بن لافي الغيداني الحربي هو شاعر من المملكة العربية السعودية، من مدينة دخنة بمنطقة القصيم، شاعر امتاز بدقة الوصف وقوة المعنى وحسن الإبداع حيث يمتاز شعرهـ بالسلاسة مع القوة، شارك في العديد من الأمسيات الشعرية، كما صدر له مؤخراً ديوان صوتي بعنوان (وصف). [1]
فيديو ذات صلة
This browser does not support the video element.
قصيدة ما بين السطور
مريت بعجاف السنين..وفي قحط شهب الشهور
والدرب موحش..كم..وكم ذيبٍ على اطرافه قنب
يا مترفه .. مافِرشت الدنيا لي زلول .. وزهور
شبعت بالرحلة ..تعب.. وارهاق.. قبل أشبع طرب
وصلت رغم انف المسافه .. لا ورغم انف الغيور
خويي الصبر الجميل .. ومشلح سلوم العرب
قولي لهم يامترفه .. يقرون (ما بين السطور)
عن شاعرٍ تنضب بحور الارض ..شعره مانضب
وقولي لهم حمّل مساحات البواخر ..فـ البخور
وش ذنبه ليا شفتها ياقاصر النظره ..خشب!!
وقولي لهم مايستحون .. من الجراءه .. والفجور
يوم استباحوا حرمة الابداع في بعض الخطب
وقولي لهم من حين..الى حين..ان حصل عنده فتور:
نتيجة فراق اكثر اصحاب المواهب ..والأدب
وقولي لهم لا اعشوشب الحب الحقيقي ..بالصدور
راعيه صمته صار من فضه .. وهرجه من ذهب
وقولي لهم من حقه ليا عاش بالدنيا.. فخور
مادامني ملهمته اللي لا تذكرها.. كتب
تمرك انفاس الصباح ..العذب .. وتجيبك ..عطور
واقلّطك على مباهيرالحفاوة ..والشبب!
معشوقتي والليل ينسج من خيوط النور ..نور
أوشك على التوديع والأشواق كتله من لهب
وانا تلاشى من عيوني كل شي اسمه حضور
الا الصباحات الجميلة.. بالنهار المرتقب
يأخذني الشوق العنيف الى اقرب دروب العبور
وأقصر دروب الشوق وأقربها .. اكثر دروبي تعب
مثل ماتشتاق لتباشير اول الصبح ..الطيور
اشتاق لك ..وأشتاق ..حتى منك لأنواع العتب
واحتاج لك مثل مايحتاج الدعا.. اصحاب القبور
وانتي قريبه من شعور القلب ..وادرى بالسبب
اليا تذكرتك اعيش احيان شي من الغرور
واشوفني أكبر حظيظ من البشر ..وأطلق شنب
ومابين تصديق الشعور ..وبين تكذيب الشعور
احيان في حالة رضى ..واحيان في حالة غضب!
بالاول احسبني على غيابك ليا غبتي ..صبور
واثرني اللي لا اذبحه جوعه على شوفك..قنب [2]
قصيدة لعيون سارة
لعيون ساره كتبت احلى المواويل
وغنيتها فدوة(ن)لعيـون سـاره
عيونها كنهـا مهـدودة الحيـل
مايناسب لوصفها الا هالعبـاره
نعسانة(ن)دوبها ماهوب بالحيـل
تسرق من النوم لكن في شطاره
اي والله اني حسدت الكحل والميل
لمصافح اهدابهـا تاره..وتـاره
تبعث من عيونها لقلبي مراسيل
لين انها احتلت القلـب بجـداره
غدى لها قلبي اوطان ومداهيـل
الحالهـا مالهـا ضره..وجـاره
الله عطاها الجمال بدون تجميـل
من كل زين الله اعطاها اخيـاره
نهارها اجمل نهار وليلهـا ليـل
لياتفـرق سـواده عـن نهـاره
ماتحصي اوصافها كثر الاقاويـل
لكن قل الحـر تكفيـه الاشـاره
في داخلي للغلا حفـل وقناديـل
وناس(ن)تعانق بعضها في حراره
ألذ مابالهوى عنـاد المواصيـل
والركض بين الحلاوه..والمراره
كل التعب..لو منه ماجا محاصيل
لخاطر عيونها ماهـو خسـاره [3]
قصيدة كلمة سلام وصباح الخير
كلمة سلام.. وصباح الخير كثرهـا
ترى لها وقعها في نفـس مجنونـك
ودي تروووح وتجي .. حتى تكررها
ماامل منها ولامن مشاهد اعيونـك
عيونك اللي قلوب النـاس تأسرهـا
من شافها تفتنه ويصيـر مفتونـك
موتي وانا حي يستوطن محاجرهـا
مابيني وبينـه الا غمضـة جفونـك
جابتك لي صدفة ٍ مدري وش آخرها
وانا تركت الجميع وقلـت ممنونـك
سلمتك الـروح تنهاهـا وتامرهـا
ياللي أخوانك على زينك يحسدونـك
لك صورة ٍ برهنت عظمة مصورهـا
عجزت اوصفك واتخيلـك وشلونـك
لـك هيبـة ٍ ماتخلينـي اناظـرهـا
ارفع لك الشوف مير يطيح من دونك
ابطيت وانا المشاعر عنك ساترهـا
وانته تبختر وتاخذني علـى هونـك
واليوم جتك المشاعر هي وشاعرها
متقاسمين الوجل .. وشلون يرضونك
كلي امل ماتجي مكسـور خاطرهـا
وانا اوعدك ماتخونك فيـه اضنونـك
والا اعتذر وارفض الاشواق وانكرها
وارتح .. وخله يزود هبال مجنونـك [4]
قصيدة ما يبرد واهج الشوق
ما يبرد واهج الشوق وشعور الهيام
غير سرد تطوي البعد بالسرعة طوي
بديها من خلف ما هوب مثله من أمام
مستوي في حال وبحال ما هو مستوي
خشمها عبرود طلقه وموخرها بهام
رافعه راعيه بإشارة ما تنغوي
واستلمها واحد خبرته عشرين عام
كبتن بالله وبكتابه إيمانه قوي
مسلم عنده خبر بالحلال وبالحرام
جاب له ربي على الدين وسلوكه سوي
وصعدت مثل أشقر فوق جول الصيد حام
لمراوحها مع الجو لجه وحدوي
مثل ما يدوي صدى صوت رعاد الغمام
صوتها صداه عبر الفضا يدوي دوي
دوبهم دكوا عن ادلاله الربع الحشام
تحتها من وقدة السمر جمر مجثوي
دايم وربعه على جلسة عنده حيام
ابلج لين جنابه لربعه وحموي
ما لي إلا هي ليا جاء للأشواق أحتدام
وقامت الذكرى على القلب تكويني كوي
لي شهر وشوي عيني محاربها المنام
ودي أحضر جوازي وادور لي خوي
بيني وبينه مسافات وحدود ونظام
واحد فرقاه شاوية فوادي شوي
بس أبا أزوره مثل ما يزارون الكرام
لين عيني من قباله وشوفه ترتوي
لو بغيت أصبر واكابر وأقول إني تمام
ذيب حبه بين جرد المحاديب ايعوي
كان مالي في دروب الهوا شف ومرام
لين شفته وأشهد أنه هواة المهتوي
يا سلام الله على السلهمه والابتسام
ويا سلام الله على ما يبيله مطروي
تقل ما لله حط في منطقة خصره عظام
وكن غيره ما احتوى مثل ما هو محتوي
لا قعد ماوده يقوم… وليا قام قام
تلوي أعناق البشر قومته يمه لوي
كن بين أعلى الجسم وأسفل الجسم انقسام
شي من جسمه مرتب وشي فوضوي
إستلمني في جبروته أشد إستلام
لين طيح معنويات راس المعنوي
يكبر الرجال أمام المهمات الجسام
ويصغر الرجال أمام الجمال الانثوي [5]