عبد الباسط حمودة يهاجم سعد الصغير ويحكي قصة زواجه الثاني: غلطة
حل المطرب الشعبي عبدالباسط حمودة، ضيفًا على الإعلامية بسمة وهبة في برنامجها "العرافة"، والمذاع على شاشة "المحور"، وتحدث عن عدد من الأمور الشخصية والفنية بصراحة شديدة.
قصة زواج عبد الباسط حمودة على زوجته
قال المطرب الشعبي عبدالباسط حمودة، إنه تزوج على زوجته "أم رامي"، لأنها كانت تغضبه، موضحًا أن مشكلاتهما انتهت بمجرد أن تزوج عليها قائلا: "رجعت لها، لأن خيرها عليّ وقدم السعد وعاشت معايا على الحلوة والوحشة، وبقول لها أنا ندمان ومش هعمل كده تاني، أنا أسف".
وأضاف حمودة: "أنا معرفش اعمل حاجة، هي اللي بتعمل كل حاجة، ممكن تشتري أكتر من شقة وأنا مكنش موافق، ورغم كده عمري ما ألاقي ضفرها، بتخاف عليّ وعلى ولادي".
عبد الباسط حمودة يهاجم عمرو مصطفى
هاجم المطرب الشعبي عبدالباسط حمودة، الملحن عمرو مصطفى بسبب سخريته من أغنيته الشهيرة "أنا مش عارفني"، قائلا: "لو مش عجباه، يعني ألحانه هي اللي حلوة؟! ولو وصل للعالمية فإحنا وصلنا لإيه؟! للكُتّاب؟! الأغنية دي اتغنت في أمريكا.. ده مش ملحن".
وأضاف حمودة : "بحب حمو بيكا لأن دمه خفيف جدا وبيضحك طوب الأرض، وبحبه وبحب حسن شاكوش".
عبد الباسط حمودة ينتقد تصرفات محمد رمضان
وحول ما إذا كان يفضل أي من النجمين، عمرو سعد أو محمد رمضان، أوضح: "بحب عمرو سعد عشان محترم وجدع، أما محمد رمضان أقول له أرجوك خلي الناس تحبك عشان أنت جميل وكويس وليك مستقبل هايل، لما بيتكلم بيبقى متعصب، ولو عملت مشكلة زي اللي حصل مع الطيار المفروض كنت أراضيه وأبوس راسه، ولما رمى الدولارات في البسين ممكن متكونش حقيقية بس أحسبها افتراء وابني لو عمل كده أموته".
رأي والد عبد الباسط حمودة فيما كان يقدمه من غناء في حياته
قال عبد الباسط حمودة، إن والده كان يدعى الريس إسماعيل، مشيرًا إلى أنه عندما كان يغني في الأفراح كان الناس يسعدون بما يقدم، لكن هذا الأمر لم يكن يرضي والده: "كان دايما يقولي أنت غنيت وحش والناس مشيت متضايقة، ولما بقيت نجم قال لي أنا كنت بعمل كده عشان ما اتغرش".
وأضاف حمودة أنه لم يسرق أغنية "أنا مش عارفني" من المطرب الشعبي طارق الشيخ، لافتًا إلى أن الشاعر الغنائي أمل الطائر جاء إليه مع شخص يدعى الحاج حنفي وعرض عليه الأغنية، كما لحنها وليد عبدالعظيم.
وتابع عبد الباسط حمودة: "بغني بقالي 45 سنة وعمري ما أخدت أغنية من حد، وأصحاب الشائعات دي ولاد حرام، وولاد الحرام كتير".
عبد الباسط حمودة يهاجم سعد الصغير
هاجم عبد الباسط حمودة، المطرب سعد الصغير، قائلا: "بيرقص وميغنيش، ميعرفش حاجة عن الغناء، طلع وقال إني بغني ومعاه استعراض وبقلده، مين سعد الصغير ده؟".
تابع حمودة: "أنا لو في فرقة ورايا بترقص هموت نفسي، في شيبة وطارق الشيخ ومحمود الليثي وحسن شاكوش".
عبد الباسط حمودة يرد على شائعات خلافه مع عمرو دياب
وحول علاقته بعمرو دياب، أوضح: "عمرو دياب مدانيش كتف، بس في معلق مشجع للزمالك اسمه أحمد الطيب، ومفيهوش ريحة الطيابة، قال إن عمرو دياب ومنير بيشجعوا الزمالك، لكن سعد الصغير وعبدالباسط حمودة بيشجعوا الأهلي، فقلت للطيب أنا الهضبة يلا".
وتابع عبدالباسط حمودة: "عمرو دياب من الناس اللي شقيت معانا، ويستحق لقب الهضبة، بس لو هو الهضبة فأنا الحكمدار، وكل واحد له لقب".
قال المطرب الشعبي عبدالباسط حمودة، إنه لا يستسلم للشيطان إذا ما حاول التغلب عليه من خلال تحريضه على بعض الأفكار السيئة، موضحًا: "بقول أستغفر الله العظيم من كل ذنب عظيم وأقرأ آية قرآنية".
وأضاف حمودة أنه لا يحب أن يتحدث عن أي شخص بسوء: "مش بحب أتكلم حد ولا أجيب سيرته ولا أغلط فيه".
وتابع، أنه لا يمكن أن يكون مغرورا: "الغرور هو الهبوط، كلنا واحد، وجيلنا أعظم جيل، وكل واحد فينا له مكان، بس المهم إني مقلدش، ورقم واحد هو محمد رشدي والعزبي، وبعدين عدوية وعبد الباسط حمودة وحسن الأسمر، ومحمود الليثي ابني وأنا معلمه واشترى مني وبيستجيب لي وطارق الشيخ أخويا الصغير واستفاد مني كتير".
قال المطرب الشعبي عبدالباسط حمودة، إنه عندما كان يغني في الأفراح الشعبية، كان المطرب الشعبي محمود الليثي صغيرا في السن، موضحًا: "كان بيجيب تسجيل وألاقيه واقف عشان يسمع أنا بقول ايه، وكنت دايما أقولهم مشوه من هنا، فربنا كرمه".
وحول تقبيل محمود الليثي ليديه، أوضح حمودة قائلا:"عنده ولاء للي علمه، ومش عيب لما يبوس إيدي ويقول لي ربنا يخليك يابا، وأنا ممكن أبوس إيد محمد رشدي الله يرحمه، أنا بعشقه".
كما أكد المطرب الشعبي عبدالباسط حمودة، إنه لا يشعر بالغيرة من أي مطرب شعبي، موضحًا: "أنا ثابت مكاني على الكرسي وكله بيقلد عبد الباسط، أنا قاعد في مكاني ورزين ومفيش واحد يهزني، كله يقلدني وأنا مقلدش حد".
وأضاف حمودة خلال حواره مع الإعلامية بسمة وهبة: "اسألي شيبة يقولك ده عمنا، وحكيم بيقول إني من أحسن الأصوات اللي جابتها مصر، أنا قصة تانية وموضوع تاني.. سموني العفريت وفريد شوقي والحكمدار والوحش".
قال المطرب الشعبي عبدالباسط حمودة، إنه لا يوافق على أن يكون المغني الشعبي حمو بيكا عضوا في نقابة الموسيقيين، مقترحا بأن تصدر النقابة له تصاريحًا للغناء حتى تستفيد منه: "لما يغني في حفلة والنقابة تستفاد منه، ده مش دخل ليها؟".
وأضاف حمودة "حمو بيكا يغني على فلاشة أو دي جي، وربنا يكرمه، هو ده بيغني؟! هتخليه يغني بالعافية؟! بس هي جاية معاه عشان طيب، ولما بكلمه بيقولي والله ما بغني يابا، فليه نقف في سكته؟!".
وحول أزمة نقابة الموسيقيين مع حمو بيكا وحسن شاكوش، أوضح حمودة: "غنوا خمور وحشيش وده لا يليق، وعمري ما أبقى نقيب، لأن ده انتحار وهتبعدني عن شغلي".
وحول بعض الامور التي لا ترضيه في الوسط الفني، تابع: "النقابة المفروض تتمسك شوية والفن المتبعزق يتلم شوية، ولازم الأستاذ هاني شاكر ياخد موقف ضد الأغنية الهابطة واللفظ الخارج، لا يمنع الأغاني دي".
عبد الباسط حمودة يعترف: لا أغني مع راقصات
قال المطرب الشعبي عبدالباسط حمودة، إنه لا يوافق على الغناء مع الراقصة جوهرة أو أي راقصة أخرى، موضحًا: "أي رقاصة بقابلها بديها بالعصاية، ولو حصل ولاقيت واحدة موجودة مش هغني وصاحب الفرح يولع".
وأضاف حمودة: "مبحبش الكلام ده، الناس هتتفرج على الرقاصة ولا تسمعني؟! المفروض الجمهور يركز معايا، ولا هتطلع 15 واحدة، إحنا في حمام سباحة؟! ولو كده مش هرجع العربون".
وتابع: "عملت أغنية مع صوفينار عشان الناس عرفتها، والمنتج والمخرج كانوا جايبينها، لكن محبش أكررها تاني".
قال المطرب الشعبي عبدالباسط حمودة، إنه كان طمعانا في أغنية "راحوا الحبايب" التي غناها أسطورة الأغنية الشعبية أحمد عدوية، موضحًا: "كنت طمعان آخدها بس الأسطورة غناها".
برنامج "العرافة" مع بسمة وهبة
وفي وقت سابق، كشفت بسمة وهبة صورة من كواليس برنامجها الرمضاني "العرافة"، حيث ظهرت بسمة في الصورة مرتدية فستانًا بلوك "البرنسيس في يوم عرسها" الذي يتجاوز سعره الـ 100 ألف دولار، من بيوت الأزياء العالمية سينكو من داخل ديكور البرنامج، وكتبت عليها: "انتظروني أول يوم رمضان بعد الفطار مباشرة أنا والعرافة على قناة المحور".
ويعد برنامج "العرافة" امتداد لبرامج بسمة وهبة الرمضانية والتي تعتمد على فضح وكشف أدق تفاصيل النجوم وخباياهم وإظهار الوجه الآخر لهم، مما يؤدي لصدمة كبيرة لدى الضيوف والمشاهدين، من المفاجآت التي تكشفها خلال الحوار وعن كيفية معرفتها بأدق تلك التفاصيل في الحياة الخاصة للفنانين.