خالد يوسف يدافع عن زينة بعد اتهامها بافتعال المشاكل
رد المخرج خالد يوسف على الاتهامات التي وجهت إلى الفنانة زينة بافتعال المشاكل والأزمات في كواليس تصوير الأعمال الفنية التي تشارك فيها.
خالد يوسف يدافع عن زينة
ونفى خالد يوسف تلك الاتهامات، مدافعاً عن زينة: "زينة أنا بشوفها ممثلة مهمة جداً، وما يقال عن إن في مشاكل بتحصل في العمل مش بشوفها كده خالص".
وأوضح خالد يوسف أنه عمل من قبل مع زينة في فيلم كارما، ولم يكن هناك مشاكل في كواليس التصوير، مؤكداً أنها تكون في قمة تركيزها وليس هناك أي جانب صحيح مما يقال عنها.
ولفت إلى أنه متحمس للغاية للعمل معها مجدداً في فيلم الإسكندراني الذي يجمع بينها وبين الفنان أحمد العوضي، قائلاً: "بصراحة، لما اشتغلت معها في فيلم "كارما" مفيش ربع مشكلة حصلت لا مع فريق العمل ولا المناخ العام ولا بتصرفاتها... زينة مجتهدة جداً ومكرّسة وقتها للعمل ومركّزة بجد، ومفيش أي حاجة من اللي بيقولوها، وعلشان كده متحمس أشتغل معاها مرة ثانية".
وأكد خالد يوسف أنه حافظ على رسالة الراحل أسامة أنور عكاشة في تفاصيل فيلم الإسكندراني، معلقاً: "يجب التحريض على تقديم الأعمال المهمة للكتاب الكبار، مثل أسامة أنور عكاشة ونجيب محفوظ ويوسف إدريس".
وتابع: "أسامة هيبقى مرتاح لو كان هو اللي هيقدمه دلوقتي هيعمله كده وهيحدثه، رؤية أسامة أنور عكاشة، في عناصر كتير في الفيلم مكنتش موجودة في الرواية في السبعينات، حافظت على محتوى الراجل والرسالة اللي عايز يقدمها".
زينة تشيد بخالد يوسف
ومن جهتها أعربت زينة عن سعادتها هي الأخرى بالتعاون من جديد مع خالد يوسف، مشيرة إلى أنها تعاملت مع مخرجين من قبل لا يقدرون قيمة الفنان، بحد قولها.
وتابعت زينة: "أنا متطمنة طول ما أنا بعمل عمل مهم ومع مخرج قادر يحافظ على مكانتي وشغلي ويحافظ عليا كبني آدمة، لأني اتعلمت اشتغل مع مخرجين يبقوا مقدرين قيمة الفنان اللي قدامهم ويكونوا عادلين".
وعن تعاونها للمرة الأولى مع الفنان أحمد العوضي، قالت زينة: "لسه أول مرة أتعاون مع أحمد العوضي، ومبسوطة بتعاوني مع كل الممثلين اللي في الفيلم، وأستاذ حسين فهمي بموت فيه وبحبه جدًا واشتغلت معاه وأنا صغيرة عندي 17 سنة، فأنا بحس إن عندي تاريخ لأني اشتغلت مع فنانين كبيرة ومحترمين".
ورداً على تقديمها أفلام تجارية فقط، علقت زينة: "الأسماء الكبيرة دايما تخدم صاحبها، لما أشتغل مع حسين فهمي وخالد يوسف حاجة تخدم ليا، وبحب أعمل أفلام تجارية وتجيب فلوس، لكن كل شوية يكون ليا ضربة مهمة عشان تثبت اسمي، أنا لازم أعمل تاريخ، لازم أشتغل مع نجوم كبار عشان التاريخ".
وعن تفاصيل شخصيتها في فيلم الإسكندراني، قالت زينة: "هقدم شخصية مختلفة، وأنا بعمل شخصية قمر هي بنت إسكندرانية جدعة وبتعيش حياة ظالمة بس بتكافح وبتعيش زي أي ست مصرية، وأنا بحس أن الستات دايمًا مكافحين في الحياة والست الكويسة تعيش على قد اللي معاها".
وأضافت: "الشخصية هيكون فيها ظلم مشاعر وكذب، وأي عمل بيبقى مسؤولية حتى لو حاجات أنا ساعات ببقى مترددة جدًا إني أعملها، والله ببقى متقنة فيها أكتر من حاجات تانية"
وواصلت حديثها: "الوجع الرومانسي للشخصيات الدرامية تمثيله أحلى، وأهم حاجة أن بطلة الفيلم متستهونش بأي مشهد، لما أعمل فيلم كبير لازم أبقى حقيقية وأقدم رسالة".
يذكر أن فيلم الإسكندراني من إخراج خالد يوسف، والذي يعود به بعد غياب، مأخوذ من رواية الكاتب أسامة أنور عكاشة، ويضم عدد من الفنانين من بينهم: "أحمد العوضي، زينة، حسين فهمي، بيومي فؤاد، محمد رضوان، رحاب الجمل، محمود حافظ، ومحمد صلاح آدم".