القصة الكاملة لأزمة رحمة حسن: رفضت تدخل أشرف زكي ووفاة والدها السبب
أثارت الفنانة رحمة حسن خلال الساعات الماضية، ضجة كبيرة بعد إعلان خلافها مع المنتج هاني أسامة على الملأ، ورفضها تدخل الفنان أشرف زكي نقيب المهن التمثيلية في حل هذه الأزمة.
بداية إعلان خلاف رحمة حسن وهاني أسامة
نشرت رحمة حسن عبر حسابها على إنستقرام، طلباً من هاني أسامة، منتج مسلسل سابع جار الذي شاركت في بطولته عام 2017 مع عدد كبير من النجوم أبرزهم دلال عبد العزيز وشيرين.
وكتبت رحمة حسن قائلة دون الخوض في تفاصيل كثيرة: "صباح الخير، أحب أقول إني ليا عند هاني أسامة المنتج 40 ألف جنيه من 2018، وكل ما أكلمه يقول لي إني مش معايا فلوس".
تابعت رحمة حسن: "أنا كمان مش معايا فلوس يا هاني بس مش بقول، أنت شغال ما شاء الله أنا لا، شكراً أنا هسيب الرسالة دي هنا".
أثارت رسالة رحمة حسن جدلا كبيرا عبر مواقع التواصل الاجتماعي، وتداولتها العديد من المواقع كما تدخل النقيب أشرف زكي على الخط.
تعليق أشرف زكي على أزمة رحمة حسن وهاني أسامة
عبر الفنان أشرف زكي في عدد من المداخلات واللقاءات التليفزيونية، عن استياءه من استخدام رحمة حسن للسوشيال ميديا في أزمتها، خاصة وأنه من جهته كان حريصاً على مساعدتها ومساندتها.
وقال أشرف زكي إن رحمة حسن ليست عضوة في نقابة المهن التمثيلية، وبالرغم من ذلك اعتبر نفسه مسؤولاً عن رجوع حقها، بعيداً عن منصات التواصل الاجتماعي.
وأردف نقيب الممثلين: "أنا قولت لها يا رحمة لا تدار المسائل عبر فيسبوك، حضرتك عندك مشكلة تقدمي للنقابة بشكوى، قالت لي لأ، أنا مش هتقدم للنقابة بشكوى أنا مش عضوة نقابة، أنا هجيب حقي بطريقتي، أنا كاتبة بوست ومش هشيله إلا لما الراجل ده يدفع الفلوس اللي عليه".
رحمة حسن تواصل هجومها: والدي مات وكنت بحاجة للمال
عادت رحمة حسن للتأكيد على أنها لن تترك حقها يضيع، لذلك فقد كشفت العديد من التفاصيل حول هذه الأزمة، وسبب نشرها على السوشيال ميديا وما عانته من أجل استرجاع حقوقها.
وكتبت رحمة حسن في منشور جديد عبر إنستقرام: "أولا: كل الاحترام والتقدير للدكتور أشرف زكي.. على استجابته وسؤاله.. وأحب أوضح أن الفلوس اللي ليا عند هاني أسامة المنتج هي باقي أجري عن مسلسل سابع جار.. وكان ليا جزء كبير منها.. ولجأت للدكتور أشرف في ٢٠١٩ علشان يساعدني.. وحصل.. واداني جزء بسيط من فلوسي.. وللعلم الوقت ده كان بابا تعبان وفي المستشفى وهاني أسامة كان عارف وقولت له أني محتاجة الفلوس أرجوك.. ورفض بعدها يديني أي فلوس من باقي أجري ومكانش بيرد على رسايل أو مكالمات مني.. للأسف بابا اتوفى بعدها بكام يوم.. ومن ساعتها وأنا تعبانة ومش ناسية هو عمل معايا إيه".
تابعت رحمة حسن: "وكان صعب عليا أني أطلب تاني من دكتور أشرف أنه يتدخل لأن هاني مش بيستجيب أصلا.. وأنا كنت تعبت من كتر ما بطلب حقي وهاني بيتهرب.. بس بين كل فترة والتانية كنت ببعت له رسالة أو أكلمه وبرضوا مافيش حاجة.. كل ده بمنتهي الذوق والاحترام والرسايل موجودة معايا من ٢٠١٨ كله على التليفون .. وطبعا الوقت بيعدي وأنا معنديش شغل ما عنديش دخل".
أضافت: "تعبت وبعت له تاني من كام يوم وقولت له.. وبرضوا ما فيش حاجة.. وكمان العقد بتاعي معايا ومخصوم منه الضرايب اللي دائما بدفعها على أي عمل بشارك فيه من زمان.. العقد بتاعي على مسلسل ٦٠ حلقة.. هاني صور وذاع ٦٧ حلقة يعني ليا كمان ٧ حلقات مش موجودين في عقدي وما أخدتش عليهم كمان أجر وما طالبتش بيهم أصلا بس هو عارف.. الفكرة أنه طلع إن في كذا شخص في الشغل مش أنا بس، عندهم نفس الموقف مع هاني.. ويمكن بفلوس أكتر بكتير وفي نفس الموضوع والنقابات والقضية وما إلى ذلك".
رحمة حسن ترد على أشرف زكي
أكملت رحمة حسن: "أما بخصوص إن الدكتور أشرف طلب مني أني أروح له النقابة عشان نتكلم في الموضوع.. أنا قولت له أني مش عايزه أتعبه أكتر من كدا معايا.. خصوصا أني عارفة أني مش نقابية وأني بشتغل بتصاريح ومش عايزه أضيع وقته خصوصا أنه ساعدني قبل كدا.. وكمان عشان عارفة أن هاني مش بيستجيب عشان هو منتج فتبع نقابة تانية.. وكنت عارفة أن الدكتور أشرف كلمه قبل كدا في موضوع الفلوس ده و برضوا ما حصلش حاجة.. يعني لو كان عايز يدفع كان دفع من زمان.. المسلسل اتذاع وخلص وهاني عمل بعده كذا عمل.. أنا قلت للدكتور أشرف زكي إني مش هقدر أجي لأني تعبانة وأني مش هاشيل البوست لحد ماخد فلوسي.. لأني بحاول أجيب حقي اللي بقالي ٣ سنين مش عارفة أجيبه".
واختتمت رحمة حسن المنشور، وهي تشكر من ساعدها وساندها، مؤكدة أنها لم تحصل بعد على أي من أموالها المستحقة.