منة فضالي تكشف عن أسباب مساندتها لأحمد عز وتتساءل عن سبب انتقاد الجمهور لها

كتبت الفنانة منة فضالي في تدوينة مطولة على صفحتها الرسمية على موقع التواصل الاجتماعي فيسبوك، وكشفت منة فضالي خلال التدوينة عن أسباب مساندتها لأحمد عز في قضية أزمة نسب توأمه التي ثبتت بحكم المحكمة.

وقالت منة فضالي في تدوينتها "مساء الخير عليكم أنا منة اللي بكتب دلوقتي وكنت عاوزه أسأل ليه بتهجموني ليه بتغلطو فيا وبتشتمو ليه عملتلكم إيه علشان الإهانات دي كلها أنا مش بجبركم على أنكم تحبوني او تتقبلوني لان دي حريه شخصية و ممكن ببساطة متدخلوش صفحتي مدام مش حبني بس مفتكرش ان في اي استفادة من الغلط 
كمان عاوزه أقول حاجة لو حد منكم واخد موقف مني بسبب صور ليا زمان ف أكيد عندكم حق بس أنا مش كدة واتكلمت في الموضوع ده كتير اوي وأكيد لو انا كده مش حيكون للنشر لان بكدة بخسر كل حاجة و صدقوني أنا اتظلمت والله اللي عايز يصدق يصدق و مش بقول كده علشان حاجه بلعكس انا خسرت حاجات كتير اوي بس صدقوني مش عيب الإنسان يغلط و يتعلم من غلطه بدليل أني عمري ما عملت فيلم او مسلسل لبسه في لَبْس وحش او عملت مشاهد إغراء
حاجة أخيرة
اللي واخد موقف مني و بيشتموني علشان وقوفي جنب احمد عز فا بقولكم ليه علشان ايه واخدين موقف انا حره زي ما اي حد حر و انا دافعت عنه لأَنِّي اعرفه كويس مش اكتر وبعتبره صديق وأخ زي ما انتم بتحبه زينه و من حقكم تدفعو عنها لان في حاجه اسمها حريه الرأي 
انا عامله الصفحه دي علشانكم انتم علشان تعرفو اخباري و تتفعلو معايا و تشجعوني مش علشان تهاجموني انا ممكن أقفل الصفحه لو انا مدائكم و اوفر عليكم الغلط فيا 
اهلًا بيكم و اسفه أني طولت عليكم و اشكر كل الناس اللي واقفه جنبي و بتشجعني و أشكر برضه اللي بيغلطو و متمناش ان حد في يوم حد يغلط في حد من أهله أشكركم من كل قلبي".