منة فضالي تكشف تفاصيل تعرضها للعنف الزوجي

كشفت الفنانة منة فضالي عن رد فعلها بعد أن تعرضت للعنف الزوجي، مشيرة إلى أنها اتخذت في النهاية قرار الانفصال عن قناعة موجهة نصيحة إلى السيدات بعدم الزواج من الشخص البخيل، وكشفت عن ظروف زواجها.

من فضالي تكشف تفاصيل تعرضها للعنف الزوجي

وقالت منة فضالي خلال لقاء لها في برنامج حكايتي المذاع على watchit: "مش هنقول عنف زوجي ولكن مرة زمان مد إيده عليا ودي كانت صدمة انفصالي، وأنا بشوف الراجل اللي بيمد إيده على الست متخلف، ولو الموقف ده أتكرر دلوقتي كان هياخد القلم ده ثلاثة أو أربعة، أكتر حاجة بكرهها إن حد يمد إيده على وشي".

وحول مواصفات من تقبل الزواج منه، أوضحت منة فضالي: "الراجل يعيبه جيبه ولسانه الطويل، ممكن أتجوز حد أقل من مستوايا المادي ولكن لحد معين.. أكيد مش هاخده أصرف عليه، مش هصرف على الكلاب والبيت وجوزي دي تبقى كارثة، ولازم يعرف يتعامل مع الأطفال".

منة فضالي تكشف تفاصيل زواجها

وأوضحت أن والدتها لم تكن موافقة على هذا الزواج، إلا أنها قررت أن تحداها، قائلة: "الزواج كان تحدي لأن أمي مكانتش موافقة وأنا كنت واخداه عِند، ولكن البنات بتفهم المشاعر أكتر، ومش كل اللي بنحس بيه بجد، والحب بييجي في سن معينة، وأنا ضد اللي بيتجوزوا بدري وببقى واثقة إن علاقتهم هتفشل.

ورفضت منة فضالي أن تكون زوجة ثانية قائلة: "مينفعش أبدًا أبقى زوجة تانية أنا معنديش حاجة ناقصة علشان تخليني أبقى زوجة تانية، ممكن أكون زوجة تانية لو هو مُطلق أو مراته متوفاة".

ووجهت نصيحة للسيدات قائلة: "نصيحتي للستات متتجوزيش راجل أكبر منك، ولا البخيل وعن تجربة، إنتي مش مجبرة تشتغلي أو تأكلي أو تضحكي علشان ترضي حد، أهم سلاح للست أنها متحسش نفسها قليلة والثقة والاعتزاز بالذات، وفي ستات ناجحة أكتر من الرجالة".

منة فضالي تنفي تعرضها للتحرش

وأشارت منة فضالي إلى أنها لم تتعرض للتحرش الجسدي في حياتها قائلة: "عمري ما اتعرضت للتحرش ومحدش يقدر يجي ناحيتي أنا بلعب Kickboxing اللي يفكر يتحرش بيا هياخد أكبر بوكس في حياته، هما بيتحرشوا بيا لفظيًا بكلام مش لطيف، وساعات كنت برد".