قصائد رشيد الزلامي

رشيد بن زيد بن مسيند الزلامي الروقي العتيبي هو شاعر نبطي وشاعر محاورة من المملكة العربية السعودية، ولد سنة 1926، وكان يقيم في مدينة الطائف، وله العديد من القصائد في الرد والرثاء، وعمل عضواً في لجنة تحكيم برنامج شاعر المعنى الذي يقام في قناة الساحة من النسخة الأولى وحتى النسخة الرابعة، وتوفي في عام 2014 عن عمر يناهز 88 عامًا. ^[1]  

قصيدة الله على اللي

الله على اللي شوحته تقطع الدار
يوصل غريب الدار ديرة ربوعه
أبيه والله مير مغلين الأسعار
والبنك ما ادله ولا أعرف فروعه
وذي حالة الدنيا لها أدوار وأدوار
يومن تواصلنا ويومن قطوعه
وكل البشر فيهم فقارا وتجار
ونفوس تتحمل والأخرى جزوعه
وحتى بنوك النقد تعجز وتنهار
ما هوب أنا عجزي بعاد رموعه
بس المهم ودون توضيح الأسرار
وضعي ووضع الجيب شكله ونوعه
شريت لي جيب عسى أبوه للنار
بانت عذاريبه من أول أسبوعه
مزعج مع الصحراء ومزعج مع القار
ومن يركبه لازم يسكر سموعه
مثل الشبح ما ينقصه غير طيار
شكله وتصميمه وممشاه روعه
من خف دمه ما بقى فيه مسمار
ولا يركبون عيال الأنذال نوعه
ما يركبون إلا سفاري وفكسار
آخر زمان جعل بقعا تصوعه
خلا رجال المرجلة مالهم كار
الذيخ لو يبكي مسحنا دموعه
الذيخ يشبع فالفضايل والأسوار
والذيب ما يدرى بفقره وجوعه ^[2]  

قصيدة : دنيا العنا

قالـوا تعلمـت قلـت عنـاد وفـراسـه
أصارع النفس والدنيـا واصارعــهـا
ودرست في مدرسة من شيّبـت راسـه
دنيا العنا اللـي قضيفـاتٍ مطامعـهـا
تلميذهـا دايــمٍ تكـتـب بقرطـاسـه
وتعطيـه جملـة دروسٍ مايضيّعــهـا
والله عطانـا نظـر وقلـوب حسـاسـه
ناخذ علوم المعرفـه مـن مراجعــهـا
ونسايـر الوقـت ونقيـسـه بمقيـاسـه
ونوجـه النفـس بالواقـع ونقـنعـهـا
وترى حيات الفتـى مهمـا قـوا باسـه
محفوفـةٍ بالخطـر والمـوت تابعـهـا
من مبتدا العمـر حتـى يلفـظ انفاسـه
يمـر فـي مرحلـه تكثـر زوابعـهـا
أول حيـات الفتـى مشـوار واعساسـه
مسافةٍ فـي عجـاج العمـر يقطعـهـا
وثاني حيات الفتـى تدريـب ودراسـه
تصعب ظروف الحياه وينشغل معـهـا
وثالث حياة الفتى يرجـع علـى ساسـه
النقطـه اللـي بـدا منهـا يراجعـهـا
يرجع لسـن الهـرم ويضيّـع الطاسـه
ويزحف مع الأرض ويخطــط شوارعها
وليـا تلاقـت متونـه وارتخـى راسـه
ضاعت جميع العلــوم اللـي مجمّعهـا ^[3]  

قصيدة يا ونتي

يا ونتي يا ما بصدري من الضيـق
من حسة لا جت بداخـل ضميـري
كنيتهـا فـي مغلقـات الصنـاديـق
لين انكسر منها الضليـع القصيـري
قالوا قدرت الصبر ما فيـه تبريـق
قلت اه من يقدر على الصبر غيـري
مير انتهى واليا انكفى الميّ ما حيـق
سود الليالي عرقلـت خـط سيـري
والله لو اشرب ماي سحب غداريـق
ما ظنتـي يبـرد ظمـاي الغديـري
ولو اشرب الذوب المصفّى على الريق
زاد السعير اللـي بكبـدي سعيـري
خط لفانـي حـرّق القلـب تحريـق
امحق بشـاره جبتهـا يـا بشيـري
انا على عهـدٍ واظـنّ العهـد بيـق
اخر زمان وكـل شـيء يصيـري
راحوا هل النمات مثـل الزواريـق
يسعـون عدوانـي بقرقـا عشيـري
الله يجازي مـن سعـى بالتفاريـق
عن جنـة الفـردوس بالزمهريـري
يا راكب اللي مع خطـاة الطواريـق
ينـوز نـوز الجافـل المستذيـري
مـن وارده مالوعـوه السـواويـق
ولا داج للعبـري وشـال الاجيـري
اخـر طـراز مغلـق الفـن تغليـق
اسبق من الاصوات عبـر الاثيـري
هـافٍ يهيـف بمجرهـد الرقاريـق
يطوي الفيافي طي سلـك الحريـري
عجل ليا دنَّـي وعجـل ليـا سيـق
والطير مـا يمديـه قدمـه يطيـري
عليـه منـدوب ليـا نشـف الريـق
قرم ليـا سـال العـرق بالنظيـري
داس الخطر من دون عهد ومواثيـق
يوم ان ولد الـلاش فكـره يحيـري
خذلي كتاب منسـق القيـل تنسيـق
مكتوم مـا يقـراه غيـر السديـري
محمـد الاحمـد مهـدي الصعافيـق
ليا عدوا اهل الطيب قاضي واميـري
وان حلّـق الدخـان بالجـو تحليـق
اميـر فـي قـود السرايـا خبيـري
وان صار بالجرعات كنّه وتشريـق
قاضي يحل العسـر حـلاً يسيـري
وان جو وبيبـان المنـازل مغاليـق
ريفـاً لهشّـال الخـلا والقصيـري
وسلم عليه وشلـق الهـرج تشليـق
واشرح له الموضوع حالي خطيـري
يعطيك راياً مـا عطـوه المطافيـق
وانا بلشت ومـن بلـش يستشيـري
وتراي بادي لك على الرجم ومويـق
عطشان شفقـان لشـوف السديـري ^[4]  

قصيدة الله مـن قلـب بـه النـار تشتـب

الله مـن قلـب بـه النـار تشتـب
هبـت وشبـت واستمـرت شبوبـه
قلـبٍ غـدى للهم مـا رد ومشـرب
وما ضاع من هم العرب راح صوبه
همٍ على ربـع وهـمٍ علـى غبـب
اليـوم والساعـه همومـه تلـوبـه
والله من عينآ تصب العبر صبصـب
القليـب اللـي تـدالـج غـروبـه
يا عبيد انا ما نيب ضبٍ ولد ضـب
يصبر لمـا يسمـع وينفـخ ذروبـه
انـا عتيبـيـآ عـريـبٍ مـعـرب
لي ما قفٍ كل الجميـع شهـدو بـه
من سب داري قلتله كـب ثـم كـب
وارخصت روحي دون داري جلوبه
لـو أنسجـن بسبابـهـا واتـعـذب
صبرت من شـان الوطـن للعقوبـه
والسجن ما هو عيب شـئ مجـرب
يعلـم المسجـون مـا هـي ذنوبـه
يلومنـي خبـلٍ إلا مــا تـغـرب
ينسى الوطن خسروا هله يوم جو بـه
فوده مع الضفـران صفـر مكعـب
فطيس قلـب و لـذة النـوم دوبـه
وانـا علـى كـل الجنـوب اتقلـب
ما ذقت حلو النوم يـوم اهتنـوا بـه
اقنب قنيب الذيب فـي راس مرقـب
من حر ما به قـام ينهـش جنوبـه
يحينـي الغربـي عصيـر إلاهـب
وريح الديار الطاهـره فـي هبوبـه
ريحة هواها مكسبـي يـوم نكسـب
اخير من ريـح البحـر والرطوبـه
عسى السحاب اللي من العصر ينصب
هلـت هماليلـه وهبـت انصـوبـه
يسقى وطن راعي العقـال المقصـب
نجد العزيز وغـرب نجـد وجنوبـه
ياديرتي مـا تقبـل الشتـم والسـب
يـا منبـع الإسـلام دار العروبـه
يفوز مذهبهـا علـى كـل مذهـب
وعلـى مقلبـت المذاهـب عقوبـه
يحكم بشرع الله وبالسيـف الأرقـب
ولا شق فيها طالـب الحـق ثوبـه ^[5]