رحمة حسن تنشر أول صورة لها بعد عضها من كلب

كشفت الفنانة رحمة حسن، تطورات حالتها الصحية بعد تعرضها لحادث عضة كلب قبل أكثر من أسبوع مضى، حيث تتواصل مع جمهورها بشكل متقطع لتطمئنهم على حالتها.

رحمة حسن تنشر أول صورة لها بعد عضها من كلب

وشاركت رحمة حسن متابعيها عبر حسابها على إنستغرام، أول صورة شخصية لها تنشرها عبر الحساب منذ واقعة عض الكلب لها.

وكتبت رحمة حسن رسالة لتطمئن الجمهور على صحتها قائلة: "الصورة دي علشان أطمن الناس اللي سألت عليا إن شاء لله أبقى كويسة واحدة واحدة".

تابعت رحمة حسن: "أنا لسه بكمل الحقن وبغير على الجرح كل يوم بس الصورة دي علشان تطمن أصحابي وكل الناس الغاليين شكرا جدا ادعوا لي إني أبقى أحسن حقيقي".

هجم كلب على رحمة حسن

وكانت الفنانة رحمة حسن قد حكت تفاصيل تعرضها لعضة كلب عبر حساباتها على مواقع التواصل الاجتماعي وكتبت: "إمبارح الساعة ١١ بليل كنت نازلة أجيب حاجة من السوبر ماركت جمب البيت، كنت ماشية علي الرصيف وكان في عربية بتركن جمبي عادي، فجأة الباب اتفتح ولقيت كلب جيرمن شيبرد بيهجم عليه بكل قوته".

أضافت رحمة حسن: "طبعا حاولت أجري لكن للأسف الكلب كان قوي وشرس ووقعني علي الأرض، حاولت أقوم وأجري وصاحبته حاولت تشده، بس فك الليش بتاعه وعضني عضه كبيرة وغويطه بنابه في منطقة حساسة".

أردفت رحمة حسن : "صاحبة الكلب كتر خيرها أخذتني فورا علي مستشفى إمبابة، أدوني حقنة تطعيم الكلب ولسه فاضل لي ٤ هاخدهم خلال شهر، بس المشكلة أن من امبارح الجرح ينزف دم كتير، وأنا طبعا خايفه ومصدومة وتعبانة وعندي تروما من امبارح والي واجعني أكتر أني مَش عارفة أتصرف إزاي، خصوصا أني أكيد مَش عايزة الكلب يتأذى، بس كمان مَش عايزة أي إنسان كمان يتأذى ويتعض ويتبهدل في الشارع زيي".

استطردت: "أنا كنت بشوف الكلب ده دائما مع صاحبته بتمشي بيه في الشارع جمب البيت عندي، وعشان شكله شرس كنت أمشي بعيد عنه لما بشوفه، امبارح صاحبة الكلب قالت لي متخافيش هو عض ولادي قبل كدا وتمام محصلش حاجة".

أكملت رحمة حسن: "طبعا أنا اتصدمت لما عرفت أنها مَش أول مرة الكلب يعض حد ومع ذلك هي سايباه عادي في الشارع من غير كمامة أو حد قوي يمسكه، بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسؤول مسؤولية كاملة عنه ويحاسب علي إهمال مسؤوليته، خصوصا لو إهماله تسبب لشخص تاني في أذى بدني يحتاج أكثر من ٢١ يوم علاج وأذى نفسي ماعرفش هايحتاج قد إيه عشان يخف".

واصلت رحمة حسن: "أنا كنت بحب أنزل أحط أكل ومياه للكلاب والقطط تحت البيت، دلوقتي أنا حقيقي مرعوبة أقرب منهم وخايفه جدا".

واختتمت رحمة حسن منشورها قائلة: "أنا آسفة طولت عليكم بس أنا بجد مَش عارفة المفروض أعمل إيه عشان محدش تاني يتأذى".

كوابيس رحمة حسن بسبب عضة كلب

أوضحت رحمة حسن أنها تعاني من كوابيس، وحالة نفسية سيئة لدرجة أنها أصبحت تخشى قطتها، وشاركت جمهورها بتفاصيل حالتها.

وكتبت رحمة: "أنا حقيقي تعبانة ومتأزمة جدا… وكوابيس و مش عارفة حتى أقرب من القطة بتاعتي والعب معاها لأني خايفة عليها لحد ما أخلص العلاج.. النهاردة أخدت الجرعة التانية ولسه هكمل طبعا".

أضافت: "ده غير وجع الجرح حقيقي.. اللي عاوزه أقوله إن فعلا لو بعد شهر ما حصلش حاجة تخص الكلب وعلاجه وتغير سلوكه وعدم نزوله بدون كمامة أنا هروح أخد موقف قانوني لأني فعلا تعبانة جسديا ونفسيا جدا جدا وخايفة جدا يحصل ده لحد تاني وأكون أنا السبب أني ماخدتش موقف".