أحمد العوضي يفاجئ شريف الدسوقي بعد رسالة مُبكية من الأخير

فاجأ الفنان أحمد العوضي، شريف الدسوقي، بعد رسالة تركها له الأخير في أحد البثوث المباشرة، وكلمات مبكية كتبها نجم مسلسل بـ100 وش على حسابه الشخصي على تطبيق فيسبوك. 

ووجه أحمد العوضي رسالة لشريف الدسوقي، ووعده بأن عملاً فني يجمعهما قريباً، وأرفق وعده برسالة دافئة للغاية تفاعل معها الجمهور، ورد عليها شريف الدسوقي.

رد أحمد العوضي على شريف الدسوقي

وكتب شريف الدسوقي لأحمد العوضي في رسالته: "لو سمحت عايز أشتغل معاك" ليفاجئه العوضي بالرد بكلمات غير متوقعة كتب فيها: "الزميل الغالي علي قلوبنا شريف الدسوقي انا مشفتش التعليق علي اللايف للأسف.. وطلبك علي راسي يا شريف انا أتشرف بالشغل معاك يا حبيبي، وأزيد بيك وأعلى بيك.. وإن شاء الله يجمعنا عمل في الوقت القريب.. وأنا من معجبينك يا شريف، ومن محبين دورك الجميل مع الزميلة الغالية نيللي كريم في مسلسل ب ١٠٠ وش".

وعبر الجمهور عن إعجابهم برد أحمد العوضي ودعمه لشريف الدسوقي في تعليقات منها: سيرتك كلها خير ونجاح وحب الناس محاوطك في كل مكان هات حد ممن ينزل وسط الناس والناس تلتف حواليه بالأعداد دي، وتديك كل الحب ده هات حد يقدر ينزل منطقة شعبية، وينزل ناسها ستات شيوخ أطفال تديك كل الحب اللي في قلوبهم هات حد اسمه في الشارع يرج الأرض زيك مقياسك الحقيقي ناسك في الشارع الكومنتات مش مقياس للنجاح والفشل والا شركات السوشيال ميديا كانت عملة ملوك أنت ملك في الشارع وسط الناس بحب الناس ودعمهم". 

وجاء في التعليقات: "عمرك سمعت عن ملك ركز في كلام الرعاع والمتآمرين الملك بيسمع لرعيته وشعبه اللي بيحبه ويفديه بحياته أنت ملك وسط شعب بيحبك لا تنظر للمتآمرين دول قلة مندسه بين الجماهير العريضة حب الناس ليك بكنوز الدنيا وخيراتها خليك شايف حب أخواتك؛ لأنهم بيحبوك من قلوبهم بإخلاص".

رد شريف الدسوقي على أحمد العوضي

في المقابل رد شريف الدسوقي عليه بكلمات: النجم الغالي اللي ساكن قلبي اقسم بالله.. ماتتصورش فرحتي قد ايه إنك قدرتني و رديت عليا.. وعلى فكرة انا عمري ما طلبت من أي نجم أني أشتغل معاه إلا أنت.. عارف ليه.. عشان حبيت طبطبتك على قلوب الناس في المبادرة اللي عاملها عشان تكسبهم ويقدروا يعدوا الأيام الصعبة.. ربنا يكرمك ويحميك ويصونك ويزيدك من نعيمه يا غالي وفي قلبي".

وكان شريف الدسوقي عبر عن حزنه العميق خلال الأيام الماضية من خلال مجموعة من الرسائل عبر حسابه الشخصي على تطبيق التواصل الاجتماعي فيسبوك،  ومن بين هذه الرسائل: "أقر انا المدعو شريف دسوقي.. أنني اكتشفت في أزمتي النفسية القاسية التى كنت أعلنت عنها منذ أيام.. اكتشفت ان ربنا وقف بجانبي، وسندنى فوق الوصف بكل كلمة اتكتبتلى في كومنت وبكل حد سأل عليا ودعالى وبكل حد حب يطمن عليا ويقويني بكلمتين. والأجمل وده فيض، وكرم من ربنا ان اللي بعتولى سوى في كومنت أو ماسينجر أو واتس آب أو اتصال".

وأضاف: "إلى أول مرة يكلمونني أكتر من اللي أعرفهم قبل كدا.. ولو أطول اعمل منشن للآلاف اللي بعتولى كنت أعملها. لكن قلبي وكياني هايوصلهم كل الشكر والامتنان اللي في قلبي ليهم. مليون محبة واحترام لكل حد بعتلي كلمة..اسماا اسم.. وفرداا فرد.. والعجيب ان الشخصية اللي اتسببتلى في هذا الألم الشديد، والذي لم أتعافى منه بعد.. فأنا لست ماكينة انا بشر مثلكم.. أحس وأحب وأشعر وأتكلم وأتألم وافرح وأحزن". وكرر شريف الدسوقي شكره لمحبيه بكلمات: "الغريب ان هذه الشخصية اكتفى ان يرسل لي عبر الواتس آب.. انا آسف على اللي حصلك، ولكن على قد المعزة. ضحكت من قلبي وماردتش عليه.. للمرة المليون بشكركم من قلبي جميعا وبجد وبصدق.. طبطبتوا على قلبي بصدق كلماتكم الرقيقة اللي سكنت قلبي بجد.. من قلب قلبي بقولكم".

شريف الدسوقي يعترف!

وعبر شريف الدسوقي عن شعوره بالألم والحزن في رسالة وضع لها عنوان "اعتراف" وكتب: "بسم الله.. اعتراف.. انا قلبي موجوع، وجع عمره ما عدى عليا قبل كده.. اقسم بالله.. كنت بشوف جمله بيكتبوا بعض الأصدقاء على صفحتى.. إنه نفسه في يتحضن ويتطبطب على قلبه.. وحد يقولى أنت كويس يا شريف وعمرك مااذيت حد.. بالعكس انا اتأذيت كتير وسامحت ياما".

وأضاف: "نفسي ربنا يرضى عني، وسامحني ويقربني منه زي ما كنت.. انا آسف إني بقول كده أو بصدر إحباط للآخرين.. بس أنا متعود أكون كتاب مكشوف لكل الدنيا.. انا فجأة بلاقي نفسي بيكى بحرقه وبغزارة في الدموع.. انا قلبي موجوع أوي يا جماعة".